İlkin mərhələ təxminən 300 uşağa vaksin vurulacaq
İngiltərədə “Oxford-AstraZeneca” peyvəndi uşaqlar üzərində də sınaqdan keçiriləcək. AYNA xarici mətbuata istinadən xəbər verir ki, ilkin mərhələ 6-17 yaş arası 300 uşağı əhatə edəcək. Bu ay başlanacağı nəzərdə tutulmuş prosesdə vaksinasiya London, Southampton və Bristolda həyata keçiriləcək. Oxford Vaksin Qrupunun direktoru Andrew Pollard açıqlamasında koronavirusun uşaqlar və gənclərdə çox da təsirli olmamasına rəğmən, onların da vaksinasiya olunmasının faydalı olacağını deyib.
Son araşdırmalarda "Oxford-AstraZeneca" vaksininin Cənubi Afrika mutasiyasına qarşı təsirsiz olduğu bəlli olmuşdu. Sözügedən peyvəndin virusun yayılmasında çox az təsiri olduğu deyilsə də, professor Sarah Gilbert mutasiya etmiş koronavirusa qarşı vaksinin hazırlandığını və payızda tətbiq oluna biləcəyini söyləyib.
Qeyd edək ki, Oxford universitetinin mütəxəssisləri qarışıq peyvənd üzərində işlədiklərini, eyni zamanda peyvəndin uşaqlar və mutasiya etmiş növlərində təsiri ilə bağlı araşdırmalar apardıqlarını bildiriblər. Onlar fevral ayının əvvəlində “AstraZeneca” peyvəndi ilə “Pfizer-BioNTech” peyvəndinin birlikdə tətbiq ediləcək testlərin başlayacağını elan etmişdilər. Araşdırmada iştirak edəcək adlardan biri olan Oksforddakı peyvənd mütəxəssisi Matthew Snape 50 yaşdan yuxarı, əvvəllər vaksinasiya olunmuş və yüksək risk qrupundakı 800 insanın iştirak edəcəyini bildirib. Peyvəndlərin 4-12 həftədən bir tətbiq ediləcəyini bildirən Snape araşdırmanın nəticələrini iyuna qədər alacaqlarını ümid etdiklərini deyib.