“Hökumətimizin sərəncamında olan hər bir vasitədən istifadə edərək, müttəfiqlərimizlə birlikdə işləyərək, lazım gələrsə, BCM-i dağıdacağıq”
ABŞ dövlət katibi Marko Rubio Haaqadakı Beynəlxalq Cinayət Məhkəməsinin (BCM) dağıdılması üçün kampaniya elan edib. Rubio qurumu Amerika suverenliyinə qəsd etməkdə günahlandırıb və BCM-ə dəstək verməyə davam edən ölkələrə qarşı sanksiyalarla hədələyib.
AYNA.AZ xəbər verir ki, Rubio "The Wall Street Journal" qəzetində dərc olunmuş məqaləsində yazıb: "Hökumətimizin sərəncamında olan hər bir vasitədən istifadə edərək, müttəfiqlərimizlə birlikdə işləyərək, lazım gələrsə, BCM-i dağıdacağıq".
Rubio BCM-in ABŞ-a qarşı "güllə və raketlərlə deyil, sözdə beynəlxalq hüququn gücü ilə" müharibə apardığını bəyan edib. O Amerika hərbi qulluqçularının və siyasətçilərinin öz ölkələrini müdafiə etdikləri üçün daim cinayət məsuliyyətinə cəlb olunmaq və hətta həbs cəzası almaq riski ilə üzləşərək xarici hakimlərin mərhəmətinə düşə biləcəklərini iddia edib.
Dövlət katibi BCM-in "solçu QHT-lər, özündənrazı qlobalistlər və ABŞ-a qarşı nifrətləri ilə birləşən düşmən üçüncü dünya ölkələri şəbəkəsi" tərəfindən dəstəkləndiyini vurğulayıb.
Dövlət Departamenti ölkələri Roma Statutundan çıxmağa və BCM-in maliyyələşdirilməsini dayandırmağa inandırmaq niyyətindədir. Dövlət Departamentinin adı açıqlanmayan bir rəsmisi CNN-ə bildirib ki, Haaqa Tribunalının yurisdiksiyasını qəbul edən ölkələr sanksiyalar, giriş qadağaları və vizaların ləğvi ilə üzləşə bilərlər. Dövlət Departamenti həmçinin xəbərdarlıq edib ki, ABŞ hüquq-mühafizə orqanları ilə əməkdaşlıq edən, ABŞ bazalarına ev sahibliyi edən və ya ABŞ-ın himayəsindən istifadə edən ölkələrdən dəstək gözləyir.
"Başqalarını qorumaq üçün həyatlarını təhlükəyə atmağa hazır olan amerikalılara qarşı bu təhdidə qarşı hansı ölkələrin bizimlə birlikdə dayandığını maraqla izləyəcəyik", - deyə Dövlət Departamentinin adı açıqlanmayan rəsmisi CNN-ə bildirib.
Bu kampaniya Donald Tramp administrasiyasının Haaqa Beynəlxalq Cinayət Məhkəməsinə təzyiqinin son mərhələsidir. Fevral ayında ABŞ Prezidenti məhkəmənin baş prokuroru Kərim Xana, onun iki müavininə və İsrailin Qəzza zolağındakı hərəkətləri və Əfqanıstandakı Amerika qoşunları ilə bağlı araşdırmalara görə altı hakimə sanksiyalar tətbiq etmişdi. Vaşinqton BCM-in yeni araşdırmalara başlaya biləcəyindən qorxur.
Rubio qurumun ABŞ qoşunlarının İranda mümkün müharibə cinayətlərini araşdırmaq çağırışını tənqid edir: "Tarix hökumətləri beynəlxalq hüququ qorumaq üçün yaradılmış qurumları necə müdafiə etdiklərinə görə mühakimə edəcək”.
Haaqada yerləşən BCM 2002-ci ildə Roma Statutuna əsasən yaradılıb. ABŞ bu müqaviləni ratifikasiya etməyib. Son illərdə məhkəmə Rusiya Prezidenti Vladimir Putin, İsrailin Baş naziri Benyamin Netanyahu və İsrailin keçmiş müdafiə naziri Yoav Qalant üçün həbs qərarı verib.