Kreml gerçəyi deyənlərdən qaçır: blokla, ya bloklama, siman onsuz da əyridir
Ukraynaya qarşı hərbi təcavüzünü “xüsusi əməliyyat” ifadəsi ilə ört-basdır edən Rusiya öz ordusunun Ukrayna xalqına qarşı törətdiyi cinayətlərə dəstək axtarır və ya ən azı özünün qınamamasına çalışır. Bu məqsədlə Kreml təkcə Rusiya nəşrlərini deyil, aralarında Azərbaycan resurslarının da olduğu xarici KİV-ləri də bloklayır.
Bu siyahıya “Zerkalo.az” da əlavə olunub. “Roskomnadzor” saytımızı Rusiyada qadağan olunmuş saytların reyestrinə daxil edib. Rusiyada söz azadlığına belə yanaşırlar. Dövlət Dumasının deputatı Mixail Delyagin açıq şəkildə Azərbaycanın neft infrastrukturuna nüvə zərbəsi endirməyə çağırır, lakin ona qarşı cinayət işi açılmır. Və Azərbaycan nəşrləri Rusiya-Ukrayna müharibəsini işıqlandıran kimi ayıq-sayıq “Roskomnadzor” öz çirkin işlərini görür.
Soruşmaq istərdik ki, niyə “Roskomnadzor” Rusiya xəbər saytlarını ikitərəfli münasibətlərə xələl gətirən açıq-aşkar anti-Azərbaycan yazılarına görə bloklamır? Azərbaycan nəşrləri birdən-birə qadağan olunmuş saytların reyestrində peyda olduğu halda, Rusiya hakimiyyəti erməni lobbisinin intriqalarına niyə göz yumur?
Rusiya mətbuatının Azərbaycana qarşı kampaniya aparmasının uzun tarixi var. Bu, xüsusilə 44 günlük müharibə zamanı özünü büruzə verdi. Rusiya KİV-ləri Azərbaycan rəhbərliyini təhqir etmək də daxil olmaqla, erməni dezinformasiyasını fəal şəkildə yayıb. Amma o günlərdə Azərbaycanda bir dənə də olsun Rusiya KİV-i bloklanmamışdı. Bizə qarşı başladılan yalan kampaniyasına Azərbaycan nəşrləri tərəfindən layiqli cavab verildi. Eyni zamanda, Azərbaycan hakimiyyəti Rusiya mediasının təxribat xarakterli fəaliyyətini ölkə üçün açıq təhlükə hesab etmir.
Ukrayna torpağında baş verənləri ideoloji yanaşmalardan asılı olaraq, hər cür adlandırmaq olar, amma bir şey aydındır - əsl müharibə gedir, dinc əhali öldürülür. Yəni bu müharibə qaydalara uyğun aparılmır və bunu dərk edən Rusiya hakimiyyəti xəbər nəşrlərinin, sosial şəbəkələrin fəaliyyətini qadağan edir.
Amma müasir dövrdə yüksək texnologiyaların inkişafını nəzərə alsaq, Rusiya ordusunun Ukraynada törətdiyi cinayətləri gizlətmək çox çətin, bəzən isə qeyri-mümkündür. Həqiqətin yalan adlandırıla biləcəyi dövrlər geridə qaldı. Napoleonun Bonapart üslublu arqumentləri - əgər bütün qəzetlərə sahib olsaydı, onun Vaterloodakı məğlubiyyətindən heç kimin xəbəri olmazdı - artıq etibarlı deyil.
Bundan əlavə, Moskvaya etiraz edən Azərbaycan mediasının bloklanması onların obyektiv və peşəkar fəaliyyətinin bir növ göstəricisidir. Sonda jurnalistin işi hadisələrin hərtərəfli və obyektiv işıqlandırılması olmalıdır. Jurnalistikanın vəzifəsi də elə budur - buğdanı samandan ayırmaq.
Yuxarıda qeyd olundu ki, Rusiya mətbuatı tez-tez Azərbaycana qarşı qərəz nümayiş etdirir, lakin “Roskomnadzor” onlara mane olmur. Bu cür qərəzli münasibət bu informasiya hücumlarına adekvat cavab verə bilən azərbaycanlı jurnalistləri çox da narahat etmir. Belə çıxır ki, Rusiya hakimiyyəti öz arqumentlərini ortaya qoya bilmir və ona görə də sakitcə Azərbaycan mediasını bloklamağı zəruri hesab edir.
Onlar Azərbaycan mediasının rus auditoriyasına təsirini açıq-aşkar şişirdirlər. Əgər Rusiya hakimiyyəti bu yolla Ukrayna məsələsində Azərbaycanın mövqeyinə təsir etmək istəyirsə, yanlış ünvana üz tutub. İlk növbədə, özünüzün axmaq, primitiv oyunlarınızdan danışmaq lazımdır. Məsələn, Kremlin təbliğatçısı Marqarita Simonyanın Rusiyanın Ukraynaya təcavüzünün simvolu - "Z" hərfinin separatçıların stendində görünməsindən cılız sevinci və nə vaxtsa Azərbaycanın bu ərazisinin Rusiyanın bir hissəsi olacağına dair axmaq ümidi barədə.
Rusiyanın ura-patriotlarının oyunları artıq Ukraynaya qarşı müharibəyə gətirib çıxarıb ki, bu da təcavüzkarı qaçılmaz fəlakətə yaxınlaşdırır. Xarici saytların bloklanması isə panasea olmayacaq. Çətin ki, Rusiyanı xəbərsiz “Pravda” və həqiqətsiz “İzvestiya” xilas etsin. Deməli, siman əyri olduğu üçün “Zerkalo”nu sındırmağa ehtiyac yoxdur.