Fridrix Merz Avropanın ən güclü ordusunu yaratmağa söz verib
Bir həftə əvvəl Almaniyanın kansleri seçilən Fridrix Merz Bundestaqda bu vəzifədə ilk çıxışını edib. AYNA.AZ xarici mediaya istinadən bildirir ki, kansler Avropanın ən güclü ordusunu yaratmağa, Ukraynaya qeyd-şərtsiz dəstək verməyə və miqrasiya qanunlarını sərtləşdirməyə söz verib.
Kansler mühafizəkar CDU/CSU blokunun (Xristian Demokrat İttifaqı və Xristian Sosial İttifaqının yaratdığı) və sol mərkəzçi Sosial Demokrat Partiyasının daxil olduğu koalisiyanın necə işləyəcəyi ilə bağlı öz baxışını təqdim edib. Merz çıxışına koalisiyanın “Almaniya üçün məsuliyyət” şüarı altında fəaliyyət göstərəcəyini bəyan etməklə başlayıb.
“Biz birlikdə ölkəmizin və onun 84 milyon vətəndaşının xidmətinə başlayırıq”, kansler vurğulayıb.
Merz Bundesverin gücləndirilməsinin əsas prioritet olduğunu deyib. Kanslerin sözlərinə görə, Almaniyaya “Avropanın ən güclü nizami ordusu” lazımdır. O orduya ayrılan vəsaiti artıracağını və əsgərlərin sayını artırmaq üçün gəncləri ölkənin təhlükəsizliyi üçün məsuliyyət daşımağa sövq edə biləcək “yeni cəlbedici könüllü hərbi xidmət” yaratmağa söz verib: "Bu, Avropanın ən böyük və güclü iqtisadiyyatı statusuna uyğundur".