Nikol Paşinyan: “Ermənistan və Azərbaycan arasında delimitasiya prosesinin hüquqi əsası artıq mövcuddur”
“Ermənistan və Azərbaycan şimaldan cənuba doğru delimitasiyanın davam etdirilməsi barədə razılığa gəliblər”. AYNA.AZ erməni mediasına istinadən bildirir ki, bu sözləri Ermənistanın Baş naziri Nikol Paşinyan jurnalistlərlə keçirdiyi brifinqdə deyib.
Paşinyan qeyd edib ki, “Ermənistan və Azərbaycan arasında delimitasiya prosesinin hüquqi əsası artıq mövcuddur”. Onun sözlərinə görə, 2024-cü ilin avqust ayında imzalanmış və oktyabr ayında təsdiqlənmiş delimitasiya komissiyalarının birgə fəaliyyəti haqqında qaydalara uyğun olaraq, iki ölkə arasında delimitasiyanın əsas prinsipi kimi Alma-Ata Bəyannaməsi qəbul edilib: “Bu o deməkdir ki, Ermənistan və Azərbaycan Sovet Ermənistanı ilə Sovet Azərbaycanı arasındakı mövcud sərhədin iki ölkə arasında dövlət sərhədi kimi yenidən qeydiyyata alınması barədə razılığa gəliblər".
Onun sözlərinə görə, bu əsasda “2021-2022-ci illərdə Azərbaycan tərəfindən tutulmuş 200 kvadrat kilometrdən çox beynəlxalq səviyyədə tanınmış Ermənistan ərazisi” məsələsi delimitasiya prosesi çərçivəsində həll olunmalıdır: “Ermənilərin və hökumətin gündəliyində olan bu məsələ, şübhəsiz ki, bu şəkildə həll olunmalıdır və bu şəkildə də həll olunacaq”.
Baş nazir həmçinin qeyd edib ki, qaydalarla nəzərdə tutulmuş qarşılıqlı məqbul həllər delimitasiya prosesi zamanı tapıla bilər.
Paşinyan həmçinin vurğulayıb ki, prosesin davam etdirilməsi ilə bağlı artıq dərc olunmuş razılaşma mövcuddur: “Bizim artıq dərc olunmuş razılaşmamız var ki, delimitasiya şimaldan cənuba aparılacaq. Aydındır ki, delimitasiya artıq baş vermiş ərazilərdə sərhəd müəyyən edilməli və bu proseslər delimitasiya prosesi çərçivəsində şəffaf şəkildə həyata keçirilməlidir”.