“Azərbaycan neft məhsullarının Ermənistana idxalı ölkədə yanacaq qiymətlərinin aşağı düşməsinə kömək edəcək”
“Azərbaycan yanacağının idxalı bazarı şaxələndirmək, rəqabət qabiliyyətini gücləndirmək və istehlakçılara bütün keyfiyyət və təhlükəsizlik tələblərinə cavab verərkən daha əlverişli seçimlər təqdim etmək məqsədi daşıyır”. AYNA.AZ-ın “Armenpress”ə istinadən məlumatına görə, bu sözlər Azərbaycandan Ermənistana neft məhsulları idxal edən “MegaTrade” şirkətinin yaydığı məlumatda qeyd olunub.
Şirkətdən bildirilib ki, "Ermənistan Respublikası və Azərbaycan Respublikasının müvafiq orqanları arasında əldə edilən razılaşma və müəyyən edilmiş prosedurlar çərçivəsində şirkət Ermənistana neft məhsulları idxal edəcək".
Qeyd edilib ki, alternativ təchizat marşrutunun bu şəkildə istifadəyə verilməsi bazarı şaxələndirmək, rəqabət qabiliyyətini gücləndirmək və bütün keyfiyyət və təhlükəsizlik tələblərinə cavab verərkən istehlakçılara daha əlverişli seçimlər təqdim etmək məqsədi daşıyır.
"İdxal olunan neft məhsulları “RanOil” yanacaqdoldurma məntəqələrində mövcud olacaq ki, bu da yanacaq qiymətlərinin aşağı düşməsinə və sənayedə daha şəffaf qiymətlərin yaradılmasına əhəmiyyətli dərəcədə töhfə verəcək. Biz təchizatların sabitliyinə və proqnozlaşdırıla bilməsinə böyük əhəmiyyət veririk və əminik ki, yeni mənbələrin cəlb edilməsi yanacaq bazarının balansına töhfə verəcək və ölkəmizin enerji və iqtisadi dayanıqlığını gücləndirəcək", - deyə məlumatda vurğulanıb.