PESKOV: "Kiyevdə Rusiya tərəfi ilə heç bir danışıqların davam etdirilməməsi qanuna çevrildi"
Putinin mətbuat katibi Peskov Ukrayna ilə danışıqların müvəqqəti mümkün olmadığını bildirib
“Rusiya Ukrayna ilə danışıqlara hazırdır, lakin Kiyevin imtinası səbəbindən indi bu, mümkün deyil”. AYNA TasS-a istinadən bildirir ki, bu sözləri Kremlin mətbuat katibi Dmitri Peskov deyib.
"Kiyevdə Rusiya tərəfi ilə heç bir danışıqların davam etdirilməməsi qanuna çevrildi", - Peskov vurğulayıb.
Kreml rəsmisi Qərb mətbuatında Ukraynanın Moskva ilə danışıqlara başlamağa hazır olduğunu nümayiş etdirməsi üçün “Vaşinqtonun səyləri” ilə bağlı dərc olunan yazıları şərh etməyib: “Bunun doğru olub-olmadığını bilmirik. Doğru xəbərlər də var, lakin ən çox mütləq fərziyyə və saf yalan olan mesajlar mövcuddur”.
Qeyd edək ki, “The Washington Post” qəzeti ABŞ Prezidenti Co Bayden administrasiyasının Ukrayna rəhbərliyi ilə danışıqlar apardığı barədə məqalə dərc edib.
Xatırladaq ki, Rusiya və Ukrayna nümayəndə heyətləri arasında sonuncu təkbətək danışıqlar mart ayında İstanbulda Dolmabağça sarayında keçirilib. Görüşün nəticələrini şərh edən Kreml sözçüsü bildirib ki, Moskva danışıqlar prosesində “ciddi irəliləyişlərin” olduğunu iddia edə bilməz. Sentyabrın sonunda Ukrayna Prezidenti Volodimir Zelenski Vladimir Putin Rusiya Prezidenti olduğu müddətdə Moskva ilə danışıqlar aparmayacağını bəyan edib.