“Lakin nə qədər çalışsalar da, Rusiyanı cilovlamaq və təcrid etmək cəhdləri uğursuzluğa düçar oldu”
Rusiya Prezidenti Vladimir Putin Şimali Koreyaya səfərindən əvvəl bu ölkənin “Nodong Sinmun” qəzetinə yazdığı məqalədə ABŞ-ın müttəfiqləri ilə birlikdə Rusiyanı sanksiyalar vasitəsilə cilovlamaq və təcrid etmək niyyətində olduğunu bildirib.
AYNA xəbər verir ki, Putin “ABŞ və onun müttəfiqləri daim yeni sanksiyalarla iqtisadiyyatımızı tükətməyə və ölkə daxilində ictimai-siyasi gərginliyin artmasına səbəb olmağa çalışır. Lakin nə qədər çalışsalar da, Rusiyanı cilovlamaq və təcrid etmək cəhdləri uğursuzluğa düçar oldu”, - deyə yazıb.
Onun sözlərinə görə, “Rusiya öz iqtisadi potensialını inamla artırmağa, sənaye, texnologiya, infrastruktur, elm, təhsil və mədəniyyəti inkişaf etdirməyə davam edir”.
Putin həmçinin Moskvanın Pxenyanla “sıx əməkdaşlığa” hazır olduğunu bildirib. Prezident qeyd edib ki, ölkələr “Qərb tərəfindən idarə olunmayan ticarət və qarşılıqlı hesablaşma mexanizmlərini” inkişaf etdirə, məhdudiyyətlərə birgə müqavimət göstərə və “Avrasiyada bərabər və bölünməz təhlükəsizlik arxitekturası qura” bilərlər.
Putin həmçinin Rusiya və Şimali Koreya universitetləri arasında akademik mobilliyi gücləndirmək, turist səfərlərini, mədəniyyət, təhsil, gənclər və idman mübadiləsini artırmaq planlarını açıqlayıb.
Ayrı-ayrılıqda Putin Şimali Koreyaya Ukraynaya qarşı müharibədə “möhkəm” dəstəyə görə təşəkkür edib və Rusiyanın “məkrli, təhlükəli və təcavüzkar düşmən”lə qarşıdurmada “müstəqillik uğrunda mübarizəsində” Pxenyanı dəstəkləyəcəyinə söz verib.
“Nodong Sinmun” qəzeti Putinin məqaləsi ilə yanaşı, Rusiyanın “milli təhlükəsizliyi və sülhü təmin etmək” uğrunda mübarizəyə girdiyini və “qürurla” nümayiş etdirdiyini vurğulayan “Rusiya Federasiyasının Prezidenti yoldaş Vladimir Putini ürəkdən salamlayırıq” adlı ayrıca məqalə dərc edib.
Qeyd edək ki, Putinin Şimali Koreyaya səfəri 2000-ci ildən bəri ilk səfər olacaq və iyunun 18-dən 19-dək baş tutacaq. Keçən ilin payızında Şimali Koreya lideri Kim Çen In Rusiyaya səfər edib. Bundan sonra Şimali Koreya Ukraynadakı Rusiya ordusuna artilleriya mərmilərinin tədarükünü artırıb. Cənubi Koreyanın müdafiə naziri Şin Vonun-sıkin sözlərinə görə, Pxenyan Moskvaya 4,8 milyon mərmi ötürə bilər.