Qrossi münaqişə tərəflərini Zaporojya AES-in nüvə təhlükəsizliyinə xələl gətirməməyə çağırıb
Ukraynada münaqişə tərəfləri Zaporojye AES-in təhlükəsizliyinə xələl gətirən hərəkətlərdən çəkinməlidirlər. AYNA xəbər verir ki, bu barədə MAQATE-nin baş direktoru Rafael Qrossinin Moskva və Kiyevə müraciətində qeyd edilib. Qrossi müraciəti “X” sosial şəbəkə hesabında edib.
“Mən MAQATE-nin beş prinsipinə zidd olan və nüvə təhlükəsizliyinə xələl gətirən hərəkətlərdən çəkinməyə çağırıram”, - deyə Qrossi vurğulayıb.
Bundan əlavə, MAQATE əməkdaşları hadisə ilə bağlı Zaporojye AES-in nümayəndələri tərəfindən məlumatlandırıldıqlarını təsdiqləyiblər. Onlar öz növbəsində obyektdə dronun partladılması faktını təsdiqləyiblər.
Qeyd edək ki, stansiyanın nümayəndələri Ukrayna ordusunun AES-in 6-cı enerji blokunun günbəzinə hücumu barədə məlumat veriblər. Ciddi xəsarət və tələfat olmadığı bildirilib.
Amma sonra üç əməkdaşın yaralandığı, onlardan birinin vəziyyətinin ağır olduğu barədə məlumat yayılıb.