Pedofil maliyyəçinin Slovakiyanın keçmiş xarici işlər naziri ilə yazışmaları: “Lavrovu sevirəm”
ABŞ Ədliyyə Nazirliyi tərəfindən dərc edilmiş sənədləri araşdıran "Biz izah edə bilərik" layihəsinə görə, Rusiya xarici işlər naziri Sergey Lavrovun adı amerikalı pedofil maliyyəçi Ceffri Epşteynin işində ən azı 142 dəfə qeyd olunur. AYNA.AZ xarici mediaya istinadən bildirir ki, belə nümunələrdən biri Epşteyn ilə Slovakiyanın keçmiş xarici işlər naziri Miro Layçak arasında 8 oktyabr 2018-ci il tarixli yazışmalardır. Mesajlarda Moldovadan olan "gözəl qızlar" və hansılarının "Miroya getməli" olduğu müzakirə olunur.
Eyni söhbətdə Epşteyn yazır ki, Lavrovun həmkarı, Rusiyanın BMT-dəki keçmiş daimi nümayəndəsi Vitali Çurkindən Çurkinin Lavrovla çəkdirdiyi fotoşəkillə birlikdə hədiyyə alıb. Layçak cavab verir: "Görək sabah Lavrov mənə nə verəcək".
Epşteyn həmçinin Rusiya XİN başçısı ilə şəxsən görüşmək istəyini bildirir. Layçak cavab verir ki, o "Lavrovu sevir". Epşteyn soruşanda "Rusiya necədir?" o Lavrovla üç saat yarım vaxt keçirdiyini və görüşü siqarla başa vurduğunu bildirir.
Açıq mənbələrdə bu dövrdə Lavrov və Layçak arasında hər hansı rəsmi və ya qeyri-rəsmi əlaqələr barədə heç bir məlumat yoxdur.
Lavrovun adı Epşteynin əvvəlki yazışmalarında da görünür. 2016-cı ilin sentyabr ayında o Avropa Şurasının o vaxtkı baş katibi Torbyorn Yaqlandla söhbətində Vladimir Putinlə mümkün əlaqələrin müzakirə olunduğunu və görüşün təfərrüatlarının Lavrov vasitəsilə əlaqələndiriləcəyini qeyd etdiyini bildirib. Bundan əlavə, Epşteynin köməkçiləri tərəfindən hazırlanmış daxili qeydlərdə Lavrovun ABŞ-ın keçmiş dövlət katibi Con Kerri ilə Suriya danışıqlarının bir hissəsi kimi görüşündən bəhs olunur və maliyyəçi sənədlərə əsasən bu danışıqları yaxından izləyirmiş.
Fayllarda həmçinin Epşteyn və Vitali Çurkin arasında 2016-cı ildən bəri yazışmaları aşkarlanıb. Söhbət diplomatın oğlu Maksimin ABŞ-a uyğunlaşmasında və iş tapmasında köməkdən gedir. Epşteyn bu dəstəyin məxfi xarakterini vurğulayıb, Çurkin isə onu "əla müəllim" adlandırıb və evinə dəvət edib.
ABŞ Ədliyyə Nazirliyinin yeni sənədləri Epşteyn ilə Rusiya arasında digər əlaqələri də ortaya qoyur. “The Telegraph” qəzeti xəbər verir ki, maliyyəçi FSB Akademiyasının məzunları ilə əlaqə saxlayıb, rus qadınlarının Qərb elitasının üzvlərinə "təslim edilməsi" məsələsini müzakirə edib və kompromat toplamaq əməliyyatlarında iştirak etmiş ola bilər. Yazışmalarda Epşteyn Vladimir Putinlə mümkün görüşlərdən də bəhs edib və 2017-ci il FTB hesabatında o Putinin "sərvət meneceri" kimi qeyd olunub.
Ümumilikdə, ABŞ Ədliyyə Nazirliyi tərəfindən dərc edilən yeni materiallar toplusunda Putinin adı min dəfədən çox, "Rusiya" sözü isə təxminən altı min dəfə çəkilib.
Cefri Epşteyn 2008-ci ildə fahişəlik şəbəkəsi ittihamlarını boynuna alıb və 2019-cu ildə cinsi istismar ittihamı ilə həbs edilib. Məhkəmə sənədlərinə görə, onun evlərində ən azı 40 qız zorakılığa məruz qalıb. 2019-cu ilin avqust ayında Epşteyn həbsxanada intihar edib.