Sepah sərt şəkildə cavab veriləcəyini açıqlayıb
Fars körfəzində İranın Sahil Mühafizə Xidmətinin katerləri ilə ABŞ-ın hərbi gəmiləri arasında insident baş verib. AYNA xarici mediaya istinadən bildirir ki, bu barədə İran İslam İnqilabının Keşikçiləri Korpusunun (Sepah) Hərbi Dəniz Qüvvələrinin yaydığı açıqlamada qeyd edilib.
Yayılan yazılı açıqlamada əvvəlcə ABŞ Müdafiə Nazirliyinin beynəlxalq sularda İrana məxsus 13 hərbi katerin ABŞ-ın 7 hərbi gəmisinə qarşı təxribat törətdiyi haqqında iddiası rədd edilib. Nəzərə çatdırılıb ki, mayın 10-da təxribat hərəkətlərini İran yox, ABŞ gəmiləri törədiblər.
Körfəzdəki ABŞ gəmiləri İranın dəniz sərhədinə həddən artıq dərəcədə yaxınlaşaraq gəmidəki hərbi vertolyotların uçuşunu təşkil edib və havaya həyəcan fişəngi buraxaraq qeyri-professional addımlar atıblar. Başqa dövlətin dəniz sərhədi yaxınlığına bu kimi hərəkətlərə yol verilməsi dənizçilik haqqında beynəlxalq qanunlara ziddir.
Sepahın Hərbi Dəniz Qüvvələri bəyan edib ki, sərhədlər yaxınlığında belə təxribatlara icazə verməyəcək və əgər qarşı tərəf qeyri-qanuni davranarsa, sərt şəkildə cavab veriləcək.