7 ildən sonra Avropa İttifaqından çıxma ideyası Britaniyada populyarlığını itirib
Getdikcə daha çox britaniyalı əmindir ki, 2016-cı ildə Avropa İttifaqından (Brexit) çıxmaq səhv idi. AYNA xəbər verir ki, bunu “YouGov” araşdırma qrupunun keçirdiyi sosioloji sorğunun məlumatları sübut edir.
Avropa İttifaqından çıxmaqdan əldə edilən kiçik iqtisadi qazanclara görə, britaniyalıların 61 faizi “Brexit”in yanlış qərar olduğunu bildirib. Yalnız 13 faiz bunu uğur adlandırıb. Eyni zamanda, britaniyalıların 55 faizi bu gün Aİ-yə yenidən qayıtmaq üçün səs verməyə hazır olduqlarını, 31 faizi isə əleyhinə olduğunu bildirib.
“YouGov”un analitikləri bildirirlər ki, illər keçdikcə Britaniyanın Avropa İttifaqına üzvlüyünü dəstəkləyənlərin sayı getdikcə artır, əleyhdarların sayı isə azalır.
“Euractiv” qeyd edir ki, Britaniya biznes sərmayəsi 2016-cı ilin ortalarından bəri digər inkişaf etmiş iqtisadiyyatlardan fərqli olaraq demək olar ki, artmayıb. Biznes sorğuları bu durğunluğun səbəblərindən biri kimi “Brexit”i göstərir.
“Brexit” tənqidçiləri həmçinin deyirlər ki, Böyük Britaniyanın Avropa İttifaqından çıxması iqtisadiyyatda onsuz da ciddi işçi çatışmazlığını daha da artırıb, çünki Aİ vətəndaşları artıq əvvəlki kimi Böyük Britaniyada sərbəst iş tapa bilmirlər.
Qeyd edək ki, 2016-cı ildə britaniyalılar referendumda Avropa İttifaqından çıxmaq üçün səs veriblər. “Brexit” əsasən Aİ-nin iqtisadi və miqrasiya qaydalarından narazı olan mühafizəkar qüvvələrin layihəsi idi və ingilislər də buna tabe oldular.
Böyük Britaniyanın Aİ-dən çıxması üçün uzun və çətin prosedurdan sonra “Brexit”in iqtisadi faydaları qeyri-müəyyən olaraq qaldı. Ölkənin faktiki olaraq Aİ-ni tərk etməsindən bir il sonra britaniyalıların əksəriyyəti nəticələrdən məyus olduqlarını etiraf etdilər.
Keçən ilin payızında Böyük Britaniyanın Maliyyə Nazirliyinin başçısı “Brexit”i təriflədi, amma qərarın konkret faydasını göstərə bilmədi.