“Hazırda Rusiyanın yaratdığı təhlükə ilə bağlı neytrallığa yer yoxdur”
Şimali Atlantika Alyansının (NATO) üzvü olmayan, lakin onun himayəsindən istifadə edən neytral ölkələr ona tam qoşulmalıdırlar. AYNA xarici mediaya istinadən bildirir ki, bu barədə Böyük Britaniyanın müdafiə naziri Qrant Şapps Londonda keçirilən təhlükəsizlik konfransında bildirib.
Nazir birbaşa olaraq bu kriteriyaya düşən Avropa dövlətlərini qeyd etməyib, lakin vurğulayıb ki, hazırda dünyada, o cümlədən Rusiyanın yaratdığı təhlükə ilə bağlı “neytrallığa yer yoxdur”.
“Bəzi Avropa ölkələri NATO-nun mövcudluğundan əhəmiyyətli dərəcədə faydalanır, bu üstünlüklərdən yararlanır. Amma qitənin kollektiv çəkindirməsinə qoşulmur. Bununla belə, Rusiya Avropa təhlükəsizliyinin arxa qapısına yaxınlaşdıqda, neytrallığa yer qalmamalıdır”, - deyə Şapps bildirib.
“Mən NATO-nun müdafiə çətirindən faydalananların hamısını təşkilata cəlb etməklə onun maraqlarını müdafiə edəcəyəm”, Şapps deyib.
Şapps həmçinin Alyansın hazırkı üzvlərini müdafiə xərclərini ÜDM-in 2,5%-nə qədər artırmağa çağırıb, baxmayaraq ki, NATO-nun 32 ölkəsinin yalnız üçdə ikisi indiyədək hazırkı 2%-lik həddi keçib.
“Politico” Britaniya müdafiə nazirinin bəhs etdiyi ölkələr arasında İrlandiya, Malta, Avstriya və İsveçrənin adını çəkir.
“Şapps açıq şəkildə bildirdi ki, London onları hərbi Alyansa qoşmaq niyyətindədir”, - nəşr qeyd edir.