Nazirlər Kabineti digər ölkələrə döyüş təyyarələri satmaq planını təsdiqləyib
Yaponiya Nazirlər Kabineti Böyük Britaniya və İtaliya ilə birgə hazırlanan yeni nəsil döyüş təyyarələrinin digər ölkələrə satışı planını təsdiqləyib. AYNA xəbər verir ki, bu barədə “The Associated Press” məlumat yayıb.
Qeyd edilib ki, bu avadanlığın ixracına icazə verilməsi qərarı Yaponiyanın birgə qırıcı layihəsində iştirakını təmin etməyə və Yaponiyanın silah sənayesinin inkişafına, qlobal təhlükəsizlikdə onun rolunun gücləndirilməsinə xidmət edəcək. Baxmayaraq ki, Tokio uzun müddətdir ölkənin pasifist konstitusiyasının müvafiq tələblərinə uyğun olaraq, silah ixracını məhdudlaşdırıb.
Nazirlər Kabinetinin baş katibi Yoşimasa Hayaşi Yaponiyanın təhlükəsizlik vəziyyətini nəzərə alaraq dəyişikliklərin zəruri olduğunu deyib, lakin pasifist prinsiplərin dəyişməz qaldığını vurğulayıb.
“Yaponiyanın müdafiəsinə təhlükə yaratmadan tələb olunan performans xüsusiyyətlərinə cavab verən qırıcı əldə etmək üçün hazır məhsulların Yaponiyadan tərəfdaş ölkələrdən başqa ölkələrə ötürülməsi lazımdır”, - deyə yapon rəsmi deyib.
Bundan əvvəl “The New York Times” yazıb ki, ABŞ Ukraynaya yardımı davam etdirmək üçün digər dövlətlərlə silah mübadiləsini nəzərdən keçirir. Münaqişə zonasına silah ixrac etmək istəmədiklərini bəyan edən ölkələr Yaponiya və Cənubi Koreyadan nümunə götürərək Amerika arsenallarından silah tədarükünü kompensasiya etmək üçün onları Vaşinqtona ötürə bilər.