Xamneyi ABŞ və İngiltərənin peyvəndlərinə etibar etmədiyini deyib
“Twitter” İranın ali dini lideri Ayətullah Seyid Əli Xamneyinin COVID-19 peyvəndi ilə bağlı paylaşımlarını silib.
AYNA xəbər verir ki, Xamneyinin ABŞ və İngiltərədəki COVID-19 peyvəndlərinin təhlükəli olduğunu bildirərək ərəb, ingilis, fransız, rus və ispan dillərində etdiyi paylaşımı “Twitter” silib. Sözügedən yazıların sosial media qaydalarına zidd olduğu səbəbiylə silindiyi bildirilib. Buna baxmayaraq, Xameneyinin fars dilindəki paylaşımına toxunulmayıb.
Qeyd edək ki, Xamneyi paylaşımında ABŞ və İngiltərənin peyvəndlərinə etibar etmədiyini bildirib: “ABŞ və İngiltərə istehsalı olan COVID-19 peyvəndlərinin ölkəyə gətirilməsi qadağandır. Əgər ABŞ həqiqətən COVID-19 peyvəndi istehsal edə bilsəydi, belə bir vəziyyətdə olmazdı. Bu məsələdə Fransaya da etibar etmirəm. Etibarlı bir koronavirus peyvəndi digər mənbələrdən tapılarsa, bu, problem olmayacaq”.
Bu paylaşımdan sonra İran Qızıl Aypara Cəmiyyətinin sözçüsü Məhəmməd Həsən Mukaddəm ABŞ-da və xaricdə yaşayan İran vətəndaşları tərəfindən yaradılan bir xeyriyyə fondu vasitəsi ilə İrana bağışlanacağı elan edilən 150 “Pfizer/BioNTech” peyvəndinin alınmasının dayandırıldığını açıqladı.