“Cənubi Qafqazda sülh və sabitlik İranın ən vacib maraqları arasındadır”
“Hər bir ölkə ərazilər və milli kimliklə bağlı tarixi reallıqları tanımalıdır və biz Ermənistana qarşı hər hansı bir iddiaya qarşıyıq. Ermənistanın ərazi bütövlüyü İran üçün həyati və kritik əhəmiyyət kəsb edir”. AYNA.AZ erməni mediasına istinadən bildirir ki, bu sözləri İranın Ermənistandakı fövqəladə və səlahiyyətli səfiri Xəlil Şirqolami İrəvan Dövlət Universitetində keçirilən tədbirdə deyib.
Diplomat əlavə edib ki, Cənubi Qafqazda sülh və sabitlik İranın ən vacib maraqları arasındadır.
Onun sözlərinə görə, İranın strategiyası və prioritetləri regionda sülh, sabitlik və inkişafdır: "Biz regionda inteqrasiya proseslərini dəstəkləyirik. Biz inanırıq ki, regional olmayan dövlətlər regionda töhfə verə və qanuni maraqlara malik ola bilsələr də, regional ölkələrin özləri inteqrasiya, inkişaf və sülhün hərəkətverici qüvvəsi olmalıdır".
Səfir qeyd edib ki, Ermənistan, Azərbaycan, Gürcüstan, İran və Türkiyə sülh prosesinə və region ölkələrinin iqtisadi rifahına və çiçəklənməsinə müsbət töhfə verə bilərlər.
“Digər ölkələr də region ölkələrinin maraqlarına xidmət etməyən heç bir təhlükəsizlik, hərbi və ya geosiyasi məqsədlər güdmədən müsbət rol oynaya bilərlər. İran bu məsələdə mühüm rol oynamağa hazırdır. Tehran bütün bu məsələlərlə bağlı Ermənistan hökuməti ilə yaxşı dialoq qurub”.