Diaspor rəhbəri 22 il müddətinə azadlıqdan məhrum edilib: əmlakı müsadirə olunacaq
Rusiyanın Kirov Rayon Məhkəməsi Yekaterinburqdakı Azərbaycan diasporunun lideri Şahin Şıxlinskini 22 il müddətinə azadlıqdan məhrum edib. AYNA.AZ xəbər verir ki, bu barədə Sverdlovsk məhkəmələrinin Mətbuat Xidməti birgə məlumat yayıb.
"Təqsirləndirilən şəxslərin xahişi ilə cinayət işi münsiflər heyəti tərəfindən dinlənilib. Münsiflər heyəti təqsirləndirilən şəxsləri 2001-ci ildə Yekaterinburqun Kirovski rayonundakı “Metallon” kafesinin yaxınlığında baş verən Yunis Paşayevin qətlində, eləcə də Feyruz Şirinovun qətlinə cəhddə günahkar bilib. Münsiflər heyəti yalnız Bəkir Səfərova cəza verməyib ", - deyə məlumatda bildirilib.
Şıxlinski cəzasının ilk dörd ilini həbsxanada çəkəcək. Bundan sonra isə maksimum təhlükəsiz cəzaçəkmə müəssisəsinə köçürüləcək.
Zərərçəkmişlər üçün ümumilikdə 600 min rubl məbləğində pulun geri qaytarılması qərara alınıb. Şıxlinskinin əmlakı, o cümlədən dörd avtomobili, iki yaşayış yeri və xeyli miqdarda nağd pulu müsadirə olunacaq.
Məhkəmə qalan həmvətənlərimizə hökm oxuyub:
Akif Səfərov – 21 il
Bəkir Səfərov – 10 il
Ayaz Səfərov – 20 il
Kamal Səfərov – 14 il
Məzahir Səfərov – 13 il
Şadyəddin Rəcəbov - 14 il.
Qeyd edək ki, Şıxlinski başqa bir cinayətdə də ittiham olunur. O və oğlu Mutvalı xüsusi təyinatlı qüvvələrin zabitinə hücum etməkdə ittiham olunur (Rusiya Cinayət Məcəlləsinin 318-ci maddəsinin 2-ci hissəsi). Müstəntiqlər hesab edirlər ki, ata və oğul "Bakı Plaza" ticarət mərkəzinin yaxınlığında zabitlər böyük Şıxlinskini dindirmək üçün saxlamağa çalışarkən təhlükəsizlik işçisini vurublar. Təqsirləndirilən şəxslər ittihamları rədd edirlər.
Qeyd edək ki, ötən ilin iyun ayında Rusiya hüquq-mühafizə orqanları Yekaterinburqda azərbaycanlılara qarşı əməliyyat keçirib. Əməliyyat zamanı güc tətbiq edilib və nəticədə iki azərbaycanlı - Ziyəddin və Hüseyn Səfərov qardaşları vəhşicəsinə öldürülüb. Digər Səfərovlar və bir neçə digər azərbaycanlı məhkəmə qərarı ilə həbs edilib. Onlar 2001, 2010 və 2011-ci illərdə törədilmiş cinayətlərdə ittiham olunublar.
Daha sonra Azərbaycan diasporunun lideri Şahin Şıxlinski və oğlu Mutvalı Şıxlinski Yekaterinburqda həbs ediliblər. Mutvalı Şıxlinskiyə qarşı dövlət məmuruna qarşı zorakılıq maddəsi ilə cinayət işi açılıb.