Rusiya Prezidenti Pekində Çinin XİN başçısı tərəfindən qarşılanıb
Rusiya Prezidenti Vladimir Putin çərşənbə axşamı axşamı Çinə rəsmi səfər edib. AYNA.AZ rus mediasına istinadən bildirir ki, Putini Pekin hava limanında Çin Kommunist Partiyası (ÇKP) Mərkəzi Komitəsinin Siyasi Bürosunun üzvü və xarici işlər naziri Vanq Yi qarşılayıb. Mərasim zamanı fəxri qarovul dəstəsi düzülüb.
Qarşılama mərasimindən sonra Rusiya Prezidenti Diaoyutay Dövlət Qonaq Evinə gedib.
Putinin səfəri rəsmi olaraq iki ölkə arasında Xoş qonşuluq, dostluq və əməkdaşlıq Müqaviləsinin imzalanmasının 25-ci ildönümünə təsadüf edir.
Səfər ABŞ Prezidenti Donald Trampın Çinə səfərindən bir neçə gün sonra baş tutub.
Putinin Çində görüş və danışıqları bu gün - 20 mayda olacaq. Bu gün yüksək səviyyəli Rusiya-Çin danışıqları və bir sıra digər tədbirlər planlaşdırılır.
Səfərindən əvvəl Putin bildirib ki, "Rusiya-Çin münasibətləri indi həqiqətən görünməmiş səviyyəyə çatıb". Putin vurğulayıb ki, "Rusiya-Çin strateji əlaqələrinin sıxlığı qlobal səhnədə mühüm, sabitləşdirici rol oynayır. Eyni zamanda, biz sülh və universal rifah üçün çalışırıq".
Rusiya Prezidenti Çin lideri Si Cinpini "uzunmüddətli yaxşı dost" adlandırıb.
Moskva və Pekin arasındakı əlaqələr Rusiyanın Ukraynaya qarşı genişmiqyaslı müharibəsinin başlanğıcından bəri güclənib. Putin hər il Çinə səfər edir. Bu da Rusiyanın bir çox ölkədən, xüsusən də Kiyevin Qərb müttəfiqlərindən diplomatik təcrid olunması ilə bağlıdır.
"France-Presse" yazır ki, Moskva iqtisadi cəhətdən sanksiyalar altında olan Rusiya neftinin əsas alıcısı olan Pekindən çox asılı olduğundan, Çin və Rusiya arasındakı münasibətlər heç də bərabər deyil.