Hazırda yoldan keçid məntəqələrində bank kartı ilə ödəniş edərək istifadə etmək mümkündür
Bakı-Quba-Rusiya ilə dövlət sərhədi ödənişli avtomobil yolundan istifadə üçün "sürətli keçid kartı"nın (SKK) tətbiqinə başlanılıb. AYNA xəbər verir ki, bu barədə Azərbaycan Avtomobil Yolları Dövlət Agentliyi (AAYDA) məlumat yayıb.
Qeyd olunub ki, kartı yolun 44.5-ci kilometrində (yanacaqdoldurma məntəqəsi) yerləşən satış məntəqəsindən, eyni zamanda, Quba və Xudat-Qusar (yolun sonuncu məntəqəsi) keçid ödəmə məntəqələrindən, həmçinin Bakıdakı 2, 5, 6 və 7 saylı, Sumqayıt 2 saylı və Quba "ASAN xidmət" mərkəzlərindən əldə etmək mümkündür.
“Hazırda yoldan SKK ilə yanaşı, keçid məntəqələrində bank kartı ilə (nağdsız) ödəniş edərək istifadə etmək mümkündür. Lakin bir müddətdən sonra ödənişli yoldan yalnız kart sahiblərinin istifadə etməsi nəzərdə tutulur. Odur ki, sürücülərdən ödənişli yoldan istifadə zamanı gələcəkdə problemlə qarşılaşmamaq üçün öncədən kartı əldə etmələri xahiş olunur”, - deyə bildirilib.