Saxlanılan şəxs əraziyə narkotik vasitəni götürmək məqsədilə gəldiyini etiraf edib
Dövlət Sərhəd Xidmətinin (DSX) Sərhəd Qoşunları Komandanlığının "Horadiz" sərhəd dəstəsinin xidməti ərazisində 17 kiloqram 235 qram narkotik vasitə (14 kq 85 qram marixuana, 3 kq 120 qram metamfetamin, 30 qram tiryək) və 500 ədəd narkotik tərkibli metadon M-40 həbinin pilotsuz uçuş aparatı (PUA) vasitəsilə İran İslam Respublikasından Azərbaycan Respublikasına keçirilməsinin qarşısı alınıb. AYNA.AZ xəbər verir ki, bu barədə DSX-dən bildirilib.
Qeyd olunub ki, keçirilmiş sərhəd axtarışı və əməliyyat tədbirləri nəticəsində Azərbaycan Respublikası vətəndaşı - 1987-ci il təvəllüdlü Azər Məhərrəm oğlu Orucov şübhəli şəxs qismində saxlanılıb.
İlkin dindirilmə zamanı saxlanılan şəxs həmin əraziyə narkotik vasitəni götürmək məqsədilə gəldiyini etiraf edib.
Fakt üzrə əməliyyat-istintaq tədbirləri davam etdirilir.
Qeyd olunub ki, dövlət sərhədinin etibarlı mühafizəsinin təmin edilməsi, narkotik vasitələr, psixotrop maddələr və onların prekursorlarının qanunsuz dövriyyəsinə qarşı mübarizə tədbirləri uğurla davam etdirilir.
