Ölkədə son sutkada COVID-19-dan 29 nəfər ölüb
Misirdə koronavirusdan ölənlərin sayı 764 nəfərə çatıb. AYNA xarici mediaya istinadən bildirir ki, son sutka ərzində ölkədə daha 29 nəfər xəstəlikdən vəfat edib.
Misirin Səhiyyə Nazirliyi mayın 24-də ölkədə COVID-19-a 752 yoluxma halının qeydə alındığını açıqlayıb. Məlumatda koronavirusa yoluxanların ümumi sayının 17 min 265 nəfərə çatdığı qeyd olunub. Əlavə edilib ki, son sutka ərzində xəstəlikdən 179 nəfər sağalıb, ümumilikdə isə ölkədə fəaliyyət göstərən 17 karantin xəstəxanasında 4807 nəfər tam müalicə olunub.
Misir hökuməti yoluxma hallarının artması ilə əlaqədar Ramazan bayramı günlərində karantin rejimini sərtləşdirib. Marketlər, iaşə obyektləri tamamilə bağlanılıb, əyalətlər arasında gediş-gəliş məhdudlaşdırılıb. Bu qaydalar mayın 29-dək davam edəcək.