Hava limanının fəaliyyəti iki-üç günə bərpa olunacaq
Polis Mahaçqala hava limanında iğtişaşların 150-dən çox fəal iştirakçısını müəyyən edib, onlardan 60-ı saxlanılıb. AYNA “İnterfax”a istinadən bildirir ki, bu barədə Rusiya Daxili İşlər Nazirliyinin Şimali Qafqaz Federal Dairəsi üzrə Baş İdarəsinin məlumatında qeyd edilib. Bildirilib ki, əlavə araşdırma üçün ərazi polis idarələrinə təhvil verilib.
Qeyd olunub ki, oktyabrın 29-da hava limanında bir qrup şəxsin törətdiyi iğtişaşlar zamanı 9 polis əməkdaşı yaralanıb və müxtəlif dərəcəli bədən xəsarətləri alıb. Onlardan ikisi hazırda xəstəxanada müalicə alırlar.
“Dağıstan Respublikası Daxili İşlər Nazirliyinin əməkdaşlarının digər hüquq-mühafizə orqanları ilə birgə həyata keçirdiyi tədbirlər nəticəsində bu qanun pozuntularının qarşısı alınıb. Hazırda hava limanı tamamilə hüquq-mühafizə orqanlarının nəzarəti altındadır”, - məlumatda deyilir.
Dağıstanın Səhiyyə Nazirliyi gecə saatlarında iyirmiyə yaxın itki barədə məlumat verib, onların arasında təhlükəsizlik qüvvələrinin əməkdaşları və mülki şəxslər var.
DİN-in Şimali Qafqaz Federal Dairəsi üzrə Baş İdarəsi aeroport ərazisində icazəsiz aksiyalara çağırışlarla bağlı Cinayət Məcəlləsinin 212-ci (kütləvi iğtişaşlar təşkil etmə) maddəsi ilə cinayət işi açıb.
Federal Hava Nəqliyyatı Agentliyi Mahaçqala hava limanını müvəqqəti bağlayıb. Dağıstanın rəhbəri Sergey Melikov jurnalistlərə deyib ki, hava limanının fəaliyyəti iki-üç günə bərpa olunacaq, çünki orada kritik infrastruktura heç bir ziyan dəyməyib.
Bu günlərdə Mahaçqala reyslərinə alternativ aerodromlar xidmət göstərəcək.
Qeyd edək ki, ötən gecə yüzlərlə Mahaçqala sakini yerli Uytaş hava limanına toplaşaraq Təl-Əvivdən gələn uçuşa etiraz ediblər. Etirazçılar Dağıstanda məskunlaşmaq niyyətində olan İsraildən olan qaçqınları qəbul etməməyə çağırıblar. Mahaçqala sakinləri İsrail Müdafiə Qüvvələrinin Fələstinin HƏMAS hərəkatına qarşı əməliyyatı səbəbindən Qəzza zolağının sakinləri ilə həmrəylik əlaməti olaraq bunun qarşısını almaq istəyiblər.
İğtişaşlar nəticəsində ikisi polis əməkdaşı olmaqla, 10-dan çox insan yaralanıb. Respublika Səhiyyə Nazirliyindən verilən məlumata görə, iki zərərçəkənin vəziyyəti son dərəcə ağır qiymətləndirilir. 59 etirazçı saxlanılaraq polis bölmələrinə aparılıb.