Deputat: “Yoluxma sayının artması, ikinci dalğanın yaranmasına və karantin qaydalarının daha da sərtləşdirilməsinə gətirib çıxara bilər”
Millət vəkili Vüqar Bayramov əhalinin karantin qaydalarına əməl etməməsindən, sosial izolyasiyaya riayət etməyərək, maskasız, əlcəksiz gəzməsindən narahatlığını bildirib. AYNA-nın xəbərinə görə, deputat deyib ki, karantin tədbirlərinin yumşaldılması heç də sosial təcrid qaydalarına əməl edilməməsi anlamına gəlməməlidir:
“Ancaq təəssüf ki, aparılan monitorinqlər göstərir ki, vətəndaşlarımızın bir qismi hətta sosial məsafənin gözlənilməsi tələbinə belə əməl etmir. Bu isə son günlər koronavirusa yoluxanların sayının artmasına səbəb olub. Pandemiyaya qarşı mübarizə və eyni zamanda hər bir vətəndaşın sosial təcrid tədbirlərinə əməl etməsi, həm onların sağlamlığı, həm də ölkə iqtisadiyyatındakı yenidən formalaşan aktivliyin qorunub saxlanması baxımından vacibdir”.
Millət vəkili vurğulayıb ki, yoluxma sayının artması, ikinci dalğanın yaranmasına və karantin qaydalarının daha da sərtləşdirilməsinə gətirib çıxara bilər.
“O baxımdan hər birimizin sosial təcrid qaydalarına əməl etməsi vacibdir. Xüsusən də sağlamlığımızın qorunması, iqtisadiyyatdakı bərpa olunan aktivliyin saxlanılması, real sektordakı artımın mərhələli şəkildə yüksəlməsi üçün sosial təcrid tədbirlərinə əməl etməyimizə və bu məsələdə daha güclü həmrəylik nümayiş etdirməyimizə ehtiyac var” – deyə, deputat qeyd edib.