Xəlil Menci Əl-Qamışlı şəhəri ərazisində zərərsizləşdirilib
Türkiyənin Milli İstihbarat Təşkilatı (MİT) Suriyada 2022-ci ilin noyabrında İstanbulda terror aktının təşkilində əli olan şəxsi məhv edib. AYNA xəbər verir ki, bu barədə “Habertürk” telekanalı MİT-in Mətbuat Xidmətinə istinadən məlumat yayıb.
Kəşfiyyat orqanlarının məlumatına görə, söhbət 6 nəfərin ölümünə səbəb olan partlayışın hazırlanmasında əsas rol oynayan Xəlil Mencidən gedir. Həmin şəxs terror təşkilatı olan PKK-nın himayəsində olub.
Əməliyyat Suriya ilə sərhəddə yerləşən Əl-Qamışlı şəhəri ərazisində həyata keçirilib. Digər təfərrüatlar hələlik açıqlanmayıb.
Qeyd edək ki, terror aktı 2022-ci il noyabrın 13-də İstanbulun Bəyoğlu səmtinin İstiqlaliyyət küçəsində baş verib. Terror aktı nəticəsində altı nəfər ölüb, 81 nəfər yaralanıb.