İrakli Qaribaşvili: “İnanıram ki, bu çağırış yeni fürsətlərə çevriləcək”
“Qarabağ müharibəsi region üçün çətin çağırış idi. İnanıram ki, bu çağırış yeni fürsətlərə çevriləcək”.
AYNA-nın APA-ya istinadən xəbərinə görə, bunu Gürcüstanın Baş naziri İrakli Qaribaşvili erməni həmkarı Nikol Paşinyanla keçirdiyi brifinqdə deyib.
O bildirib ki, bu fürsətlər Ermənistana və onun xalqına firavanlıq gətirə bilər.
Baş nazir vurğulayıb ki, Ermənistanın siyasi-iqtisadi stabilliyi regionun stabilliyi ilə əlaqəlidir.
“Xatırlatmaq istərdim ki, son 30 il ərzində regionda bir çox münaqişələr baş verib. Bizim ortaq baxışımız və səylərimiz regionu sülh, əmin-amanlıq və fürsətlər regionuna çevirməkdir. Bu, bizim ortaq baxışımız olmalıdır və bu istiqamətdə işləməyə davam etməliyik”, - deyə İ. Qaribaşvili vurğulayıb.
Baş nazir onu da qeyd edib ki, N. Paşinyanla görüş zamanı tərəflər iqtisadi, ticari, nəqliyyat, kommunikasiya əlaqələri ilə bağlı məsələləri müzakirə ediblər.