Metropolitan Şio Gürcüstanın 142-ci Katolikos-Patriarxı seçilib
Genişləndirilmiş kilsə məclisi Gürcü Kilsəsinin yeni patriarxını seçib. AYNA.AZ gürcü mediasına istinadən bildirir ki, Kilsənin əvvəlki rəhbəri II İlyanın yerli nümayəndəsi vəzifəsində çalışmış Metropolitan Şio Gürcüstanın 142-ci Katolikos-Patriarxı seçilib.
Yeni dini rəhbər 39 səsdən 22-sini alıb və Metropolitan Şio Bütün Gürcüstanın Avtokefal Apostol Pravoslav Kilsəsinin Katolikos-Patriarxı seçilib.
Şio III adını daşıyacaq yeni patriarxın taxta çıxma mərasimi mayın 12-də keçiriləcək.
Qeyd edək ki, Bütün Gürcüstanın Katolikos-Patriarxı II İlya 17 martda 93 yaşında vəfat edib. Onun ölümü ilə əlaqədar milli matəm elan olunub və matəm 22 martda keçirilən dəfn mərasiminə qədər davam edib.
