Elektron seçki qutularından istifadə edilən bütün seçki məntəqələrində seçkilərin nəticələri ləğv oluna bilər
Gürcüstanın Tetritskaro rayon məhkəməsi 30 seçki məntəqəsi üzrə seçkinin nəticələrini ləğv etmək barədə qərar qəbul edib. AYNA gürcü mediasına istinadən bildirir ki, hakim Vladimir Xuçua istintaq eksperimentindən sonra səsvermənin məxfiliyinə “birmənalı şəkildə” riayət edilmədiyinə qərar verib.
Belə ki, məhkəmə iclası zalında elektron seçki qutuları vasitəsilə saxta seçki keçirilib. İştirak edənlər əmin olublar ki, bülletendə qoyulmuş işarə zərfin çərçivəsindən maşına götürüldükdə görünür.
İddianın müəllifi Gürcüstan Gənc Hüquqşünaslar Assosiasiyası olub. Təşkilat elektron seçki qutularından istifadə edilən bütün seçki məntəqələrində seçkilərin nəticələrini ləğv etməyə çalışacaq. Bu, seçicilərin 90%-ni təşkil edir.
“Məhkəmə Assosiasiyanın iddiasını təmin etdi və bu, seçicilərin səsvermənin gizliliyi hüququnun qorunmasında yeni presedent yaradır. Məhkəmə təsadüfi seçmə üsulu ilə Tsalka və Tetritskaro rayonlarında bir neçə seçki məntəqəsinin bülletenlərini yoxlayıb, orada səsvermənin gizliliyi hüququnu pozan bülletenlərin arxasında markerin izlərinin göründüyü təsdiqlənib. Baxışı özü aparan hakim səsvermə bülleteninin səsvermə maşınına qoyulması zamanı məxfiliyin aşkar şəkildə pozulmasını qeyd edib. Assosiasiya bu qərarı alqışlayır və onun demokratik seçki prosesinin təmin edilməsində əhəmiyyətini vurğulayır”, - Assosiasiyanın bəyanatında deyilir.
Bu, Gürcüstanda yeganə məhkəmədir ki, bu günlərdə səsvermə gizliliyinin pozulması ilə bağlı iddianı təmin edir. Ümumilikdə, hazırda məhkəmələr müxalifət partiyalarından və qeyri-hökumət təşkilatlarından müxtəlif növ pozuntularla bağlı 1,3 mindən çox şikayətə baxır. Şikayətlər Tiflis, Rustavi, Bolnisi, Kutaisi, Batumi, Qurcaani, Mtsxeta, Siqnaxi, Tetritskaro, Xaşuri, Telavi, Qori, Zuqdidi, Ozurqeti, Xelvaçauri, Senaki, Poti, Axaltsixe şəhər və rayon məhkəmələrinə verilib. 20-dən çox hakim şikayətlərə baxacaq.