"ABŞ-ın Qrenlandiyanı ələ keçirmək istədiyini demək tamamilə məntiqsizdir”
Danimarka Baş naziri Mette Frederiksen ABŞ Prezidenti Donald Trampı Qrenlandiyanı ələ keçirməklə hədələməməyə çağırıb.
AYNA.AZ xarici mediaya istinadən bildirir ki, Baş nazir rəsmi saytında dərc olunmuş açıqlamada bildirib: "ABŞ-ın Qrenlandiyanı ələ keçirmək istədiyini demək tamamilə məntiqsizdir. ABŞ-ın Danimarka Krallığının üç hissəsindən heç birini ilhaq etmək hüququ yoxdur".
O qeyd edib ki, Qrenlandiya Danimarkanın bir hissəsidir, həmçinin NATO-nun bir hissəsidir və Şimali Atlantika Alyansının təhlükəsizlik zəmanətləri ilə əhatə olunur.
Frederiksen xatırladıb ki, Danimarka və ABŞ arasında Vaşinqtona Qrenlandiyaya geniş giriş imkanı verən müdafiə müqaviləsi var.
Bundan əlavə, Danimarka Baş naziri bildirib ki, "Krallıq Arktikada təhlükəsizliyin təmin edilməsinə əhəmiyyətli dərəcədə sərmayə qoyub".
"Buna görə də, mən ABŞ-ı tarixən yaxın müttəfiqə, eləcə də satış üçün olmadığını açıq şəkildə bildirən başqa bir ölkəyə və insanlara qarşı təhdidləri dayandırmağa çağırıram", Frederiksen əlavə edib.