“Kopenhagenin Qrenlandiya ilə bağlı mövqeyi dəyişməz olaraq qalır”
“Kopenhagenin Qrenlandiya ilə bağlı mövqeyi dəyişməz olaraq qalır. Ada satılmır”. AYNA.AZ xarici mediaya istinadən bildirir ki, bu sözləri Danimarkanın Baş naziri Mette Frederiksen NATO sammiti çərçivəsində Ankarada jurnalistlərə deyib.
"Bizim mövqeyimiz həmişəki kimi aydındır. Qrenlandiya əlbəttə ki, satılmır. Ümid edirik ki, bütün müttəfiqlər də daxil olmaqla hər kəs Qrenlandiya xalqının öz müqəddəratını təyin etmək hüququna hörmət edəcək. Biz suveren dövlətik və hər kəsin ərazi bütövlüyümüzə və suverenliyimizə hörmət etməsini istəyirik", - deyə Baş nazir bildirib.
Frederiksen həmçinin NATO-nun üzv ölkələrinin təhlükəsizliyinin təmin edilməsindəki əsas rolunu vurğulayıb: "NATO olmadan xalqımı qoruya bilməzdim. Və düşünürəm ki, eyni şey ABŞ-a da aiddir. NATO-nu illər əvvəl yaratmağımızın səbəblərindən biri də odur ki, əgər birimizin başına bir şey gəlsə, hamımız bir-birimizin müdafiəsinə qalxmalıyıq. Yəni, 5-ci maddə bizim sığorta siyasətimizdir".
Bir gün əvvəl ABŞ Prezidenti Donald Tramp Ankarada keçirilən NATO sammitində Qrenlandiyanın Danimarka deyil, ABŞ-ın nəzarəti altında olması lazım olduğunu bildirib.