“İndi emosiyalara qərq olmuşam, çox qürurlu və xoşbəxtəm”
Serbiyalı tennisçi Novak Cokoviç 2024-cü ildə Parisdə keçirilən Olimpia Oyunlarında qələbəni karyerasındakı əsas uğuru adlandırıb.
AYNA xəbər verir ki, bazar günü 37 yaşlı idmançı Olimpiadanın təkbətək turnirinin final görüşündə ispaniyalı Karlos Alkaraza qalib gəlib və karyerasında ilk dəfə Olimpiya qızılını qazanıb.
"İndi emosiyalara qərq olmuşam, çox qürurlu və xoşbəxtəm. Karyeramda ilk dəfə ölkəm üçün Olimpia Oyunlarının qızılını qazanmaq fürsətindən yararlandım. Bu, bəlkə də mənim ən böyük uğurumdur. Fərdi karyeramda qazana biləcəyim hər şeyi yəqin ki, qazanmışam. Serbiya üçün 37 yaşında Devis Kubokunu və xüsusilə olimpia qızıl medalını qazanmam görünməmiş bir hadisədir. Yenicə qeyd etməyə başlayıram. Növbəti 48 saat ərzində nə olacağını görmək üçün səbirsizlənirəm”.
- Bu qələbə karyeranızda tapmacanın ən son çatışmayan parçası idi?
- Bəli. Öz-özümə deyirəm ki, bacardım. Bəzən özümü çox tənqid edə bilirəm. Bu, özümlə mübarizə apardığım ən böyük daxili döyüşlərdən biridir. Mənə elə gəlir ki, həyatımda və meydandan kənarda kifayət qədər iş görməmişəm və ya kifayət qədər nailiyyətlər qazanmamışam. Ona görə də bu mənim üçün böyük dərsdir. Ölkəm üçün tarixi qızıl medal qazanmağın xeyir-duasına görə çox minnətdaram. Qızıl Dəbilqəni tamamlamağı və bütün rekordları əldə etməyi bacardım.
- Bu sizə kifayət edirmi?
- Mən belə düşünürəm.
Tennisdə “Qızıl dəbilqə” Böyük Dəbilqə turnirlərində bütün dörd titulun, eləcə də olimpia qızılının ümumi fəthidir. Cokoviç tarixdə buna nail olan 5-ci tennisçi olub.
Cokoviç 24 dəfə Böyük Dəbilqə yarışlarının qalibidir və ATP reytinqində bir nömrədə ən çox həftəlik rekorda sahibdir. Onun üçün Fransanın paytaxtında keçirilən oyunlar karyerasında beşinci oldu. Əvvəllər 2008-ci ildə Pekin Olimpia Oyunlarında serbiyalı təkbətək yarışlarda bürünc medal qazanmışdı.