İspan klubu 18 yaşlı hücumçu Həmzə Əbdülkərimlə müqavilə imzalayıb
"Barselona" bazar günü 18 yaşlı hücumçu Həmzə Əbdülkərimlə müqavilə imzaladığını açıqlayıb. AYNA.AZ xarici mediaya istinadən xəbər verir ki, hücumçu gənclər komandasında oynayacaq. İspan klubu Əbdülkərimi icarəyə götürmək hüququ ilə transfer edib.
"Barselona"nın Mətbuat Xidmətindən qeyd edilib ki, Əbdülkərim klub tarixində ilk misirli oyunçudur.
Qeyd edək ki, Əbdülkərim əvvəllər Misir gənclər komandasında yaxşı çıxış edib.
Misirlinin bu mövsüm “Barselona”nın əsas heyətində yer alması ehtimalı azdır, lakin bu yay Flikin komandası ilə mövsümöncəsi məşqlərdə iştirak etməsi gözlənilir. Müqavilə imzalayarkən katalonlar misirliyə 2026-cı ilin yayında əsas komanda ilə mövsümöncəsi məşqlərdə iştirak edəcəyinə söz veriblər. Bu, oyunçunu transferə razı olmağa təşviq edib.
Həmzə uzun müddətdir Avropa klublarının transfer siyahısındadır. Son bir il ərzində o ən azı "Bavariya", "Lion", "Milan" və "Feyenoord"un diqqətində olub. İlin sonuna yaxın "Barselona" gənc misirli oyunçu ilə təmasa keçib və noyabr ayında "Əl-Əhli"nin nümayəndələri ilə ilkin danışıqlar aparılıb.