"Bu, həm müttəfiqlərimizə, həm tərəfdaşlarımıza, həm də Amerika sənayesinə çox zərərlidir"
ABŞ federal hökumətin bağlanması səbəbindən NATO müttəfiqlərinə və Ukraynaya 5 milyard dollardan çox dəyərində silah ixracını dayandırıb. AYNA.AZ xəbər verir ki, bu barədə “Axios” ABŞ Dövlət Departamentinə istinadən məlumat yayıb.
Dövlət Departamentinin yüksək vəzifəli rəsmisi nəşrə bildirib ki, "bu, əslində həm müttəfiqlərimizə, həm də tərəfdaşlarımıza, eləcə də Amerika sənayesinə çox zərərlidir".
O bunun Danimarka, Xorvatiya və Polşa üçün AMRAAM raketləri, “Aegis” döyüş sistemləri və HIMARS kimi silahların tədarükünə aid olduğunu vurğulayıb.
Xəbərdə bildirilib ki, ixracın son təyinat yeri məlum deyil, lakin "NATO müttəfiqlərinə silah satışı çox vaxt Ukraynaya kömək üçün yönəldilir".
Rəsmi şəxsin sözlərinə görə, gözlənilən müqavilələr həm ABŞ hökumətindən müttəfiqlərə birbaşa silah satışı, həm də ABŞ-ın özəl müdafiə şirkətlərinin ixrac üçün lisenziyalaşdırılmasını əhatə edir.
Nəşr yazıb ki, Silah İxracına Nəzarət Qanunu Konqresdən silah satışı təkliflərini nəzərdən keçirməsini tələb edir, lakin Konqres komitəsinin işçilərinə məlumat vermək vəzifəsi olan Dövlət Departamentinin bir çox işçisi bağlanma səbəbindən məzuniyyətdədir və bu da problemə səbəb olub.