“Hər şeyin başlamasının əsas səbəblərindən biri bu idi”
ABŞ Prezidenti Donald Tramp Ukraynanın Şimali Atlantika Alyansına (NATO) qoşulmayacağına əmindir. AYNA.AZ xarici mediaya istinadən bildirir ki, bu barədə Tramp Ukraynanın NATO-ya daxil olmasının mümkünlüyü ilə bağlı sualı cavablandırarkən deyib.
“Mən çox nəzakətlə deyə bilərəm ki, bunun üzərində işləyəcəyik. Ancaq qulaq asın, bu baş verməyəcək”, - Amerika lideri vurğulayıb.
Tramp Ukraynadakı münaqişəyə və Qərbin Kiyevi NATO-ya cəlb etmək cəhdlərinə toxunaraq bildirib: “Elə hər şeyin başlanğıcı budur. Yəni hər şeyin başlamasının əsas səbəblərindən biri bu idi”.
Bəzi ərazilərin Kiyevin nəzarətinə qaytarılmasının mümkünlüyündən danışan Tramp qeyd edib: “Əlbəttə, mümkün qədər geri qaytarmağa çalışacağıq. Ancaq Ukraynanın NATO-ya daxil olmasına gəldikdə, bu, sadəcə olaraq baş verməyəcək”.
Fevralın 26-da Ağ Evdə jurnalistlərə açıqlama verən Tramp deyib ki, Ukrayna NATO-ya daxil olmaq istəyini unuda bilər.