“İran bir daha bu boğazdan bizə qarşı şantaj aləti kimi istifadə edə bilməyəcək”
ABŞ Prezidenti Donald Tramp hazırda İranın blokadası altında olan Hörmüz boğazı üzərində nəzarəti bərqərar etməyə çalışır. O hətta bu strateji su yolunun adını onun şərəfinə dəyişdirmək ideyasını da nəzərdən keçirir. AYNA.AZ xəbər verir ki, bu barədə "New York Post" qəzeti məlumat yayıb.
Nəşrin mənbələri bildirib ki, boğaza nəzarət məsələsi ABŞ Prezidentinin ön planındadır.
"Biz boğaza nəzarəti təmin edəcəyik. Bu, qaçılmazdır. İran bir daha bu boğazdan bizə qarşı şantaj aləti kimi istifadə edə bilməyəcək. Buna şübhə etməyin", - deyə Tramp administrasiyasının nümayəndəsi bildirib.
Mayamidə keçirilən Gələcək İnvestisiya Təşəbbüsü sammitində çıxış edən ABŞ Prezidenti isə bildirib ki, iranlılar dünya gəmiçiliyi üçün vacib olan bu boğazı açmalıdırlar: “"Tramp boğazı” açılmalıdır. Hörmüz boğazını nəzərdə tuturam. Bağışlayın, çox üzr istəyirəm. Dəhşətli bir səhv. Saxta xəbərlərdə yazacaqlar: "O, təsadüfən dedi. Xeyr, mən nə danışdığımı bilirəm".
Nəşrin əldə etdiyi məlumata görə, bölgədəki tapşırığın uğurla yerinə yetirilməsi halında, Tramp həqiqətən də boğazı "Amerika" və ya "Trampın boğazı" adlandırmaq imkanını nəzərdən keçirir.
Xatırladaq ki, ABŞ bölgədəki hərbi mövcudluğunu gücləndirməyə çalışaraq minlərlə dəniz piyadasını Hörmüz boğazı ətrafına köçürməyə başlayıb.