Muxtar icmada fırtınalar 4 milyard avrodan çox ziyana səbəb olub
Son günlərdə İspaniyanın cənubundakı Əndəlüs muxtar icmasında fırtınalar 4 milyard avrodan çox ziyana səbəb olub. AYNA.AZ xəbər verir ki, bu barədə "El Mundo" qəzeti məlumat yayıb.
Bildirilib ki, bu rəqəmə kənd təsərrüfatına dəyən ziyan (təxminən 3,4 milyard avro) və zədələnmiş yol şəbəkəsinin təmiri xərcləri (500 milyon avrodan çox) daxildir. Güclü yağışlarla müşayiət olunan fırtınalar 10 min qəzaya səbəb olub. Bundan əlavə, təhlükəsizlik səbəbi ilə 11 mindən çox insan təxliyə edilib, baxmayaraq ki, təxminən 2000 nəfər 8 fevralda evə qayıda bilib.
Əndəlüs hakimiyyəti infrastruktur və əsas iqtisadiyyata dəyən milyonlarla dollarlıq itkiləri aradan qaldırmaq üçün İspaniya hökumətindən və Avropa Birliyindən əlavə vəsait istəyib. Qeyd olunub ki, regional kabinetin ilkin hesablamalarına görə, Əndəlüs kənd təsərrüfatı istehsalının təxminən 20%-nə ziyan dəyib və bu sektorun 2024-cü ildə 17 milyard avroya çatacağı təxmin edilir.
Ən son fırtına bölgədə 4 fevralda olub. Həmin vaxt İspaniyanın dövlət meteorologiya agentliyi yağış və güclü külək səbəbindən Əndəlüs üçün hava xəbərdarlığı edib. Bir neçə şəhər və kənd həyəcan siqnalı səviyyəsini maksimuma - qırmızıya (həddindən artıq təhlükə) qaldırıb. Şiddətli hava şəraitinə görə məktəblərdə tədris dayanıb, onlarla yol bağlanıb, dəmir yolu xidmətini dayandırıb və hava limanlarında problemlər yaranıb.