Latviya, Litva və Estoniya Moskvanı GPS naviqasiya sistemini sıxışdırmaqda ittiham edib
Latviya, Litva və Estoniyanın xarici işlər nazirləri Rusiyanı GPS naviqasiya sistemini sıxışdırmaqda və Baltik dənizi regionunda hava hərəkətinə müdaxilə etməkdə ittiham ediblər. AYNA xəbər verir ki, bu barədə “Financial Times” məlumat yayıb.
Litvanın xarici işlər naziri Qabrielius Landsberqis deyib ki, Rusiya sərhədlərinə yaxın Baltik regionunda vəziyyət indi gözardı etmək üçün çox təhlükəlidir.
Estoniyanın xarici işlər naziri Margus Tsahkna bildirib ki, ölkə baş verənlərə Rusiya Federasiyasının “düşmən fəaliyyətinin” bir hissəsi kimi baxır və vəziyyəti müttəfiqləri ilə müzakirə etmək niyyətindədir.
Mütəxəssislərin fikrincə, son aylarda on minlərlə mülki uçuş GPS müdaxiləsi səbəbindən təsir görüb. Naviqasiya sisteminin tıxanması Baltik dənizində qayıqların istifadə etdiyi siqnalların ötürülməsini də çətinləşdirib.
Aprelin 25 və 26-da Helsinkidən Estoniyanın Tartu şəhərinə uçan iki “Finnair” reysi GPS müdaxiləsi səbəbindən geri dönərək Finlandiyaya qayıtmağa məcbur olub.