“Radarlar 10-dan çox obyekti qeydə alıb və təhlükə yarada bilən obyektlər zərərsizləşdirilib”
Polşa pilotsuz təyyarələri vurmaq üçün özünün və NATO-nun hava hücumundan müdafiə sistemlərindən istifadə edib. AYNA.AZ xəbər verir ki, bu barədə “Reuters” Polşa hərbi komandanlığına istinadən məlumat yayıb.
Bildirilib ki, bu, Rusiya-Ukrayna münaqişəsi zamanı ilk dəfədir ki, Varşava öz hava məkanında hava hücumundan müdafiə sistemindən istifadə edir.
Komandanlığa görə, radarlar 10-dan çox obyekti qeydə alıb və təhlükə yarada bilən obyektlər “zərərsizləşdirilib”.
"Hava məkanımıza daxil olan pilotsuz təyyarələrin bəziləri vurulub. Bu obyektlərin mümkün qəza yerlərinin axtarışı və müəyyənləşdirilməsi davam edir", - məlumatda qeyd edilib.
Polşa ordusu ölkənin hava məkanının pozulmasını “təcavüz aktı” adlandırıb. Müdafiə naziri Vladislav Kosiniyak-Kamış Polşa təyyarələrinin “düşmən obyektlərə qarşı silahdan istifadə etdiyini” söyləyib. Əlavə edib ki, ölkə NATO komandanlığı ilə daim əlaqə saxlayır.