Aleksandru Muntyanunun rəhbərlik etdiyi hökumət fəaliyyətə başlayıb
Aleksandru Muntyanunun rəhbərlik etdiyi Moldovanın yeni hökuməti bu gün rəsmi olaraq işə başlayıb. AYNA.AZ xəbər verir ki, "Avropa Pravda"sının məlumatına görə, mərasim Moldova Prezidenti Maya Sandunun “Facebook” səhifəsində canlı yayımlanıb.
Muntyanu və nazirlərinin andiçmə mərasimi Sandu və bir gün əvvəl hökumətə etimad səsi verən Moldova Parlamentinin spikeri İqor Qrosunun iştirakı ilə baş tutub.
Moldova Prezidenti çıxışında qeyd edib ki, yeni hökumət ölkəyə Avropa İttifaqına üzvlük yolunda kömək edəcək islahatları və proqramları başa çatdırmalıdır.
"Bizə iqtisadi inkişafı təmin edəcək cəsarətli tədbirlər lazımdır. Bütün məqsədlərə yalnız Avropa İttifaqının təqdim etdiyi tarixi fürsətdən istifadə etsək nail olmaq olar", - deyə Prezident bildirib.
Ötən həftə Moldova Prezidenti 20 ildən çoxdur Ukraynada yaşayan iş adamı Aleksandru Muntyanunu Baş nazir vəzifəsinə rəsmi olaraq namizəd göstərib.