“MilliÖn” terminalları əlavə məbləği hansı məqsədlə tələb edir?
Ödəmə terminallarında 1 manat xidmət haqqı tutulacaq. Bunu “Milliön” müştəri xidmətlərinin rəhbəri Ülviyyə Əfəndiyeva “Birinci studiya” verilişində deyib.
“Hazırda yalnız “Azərişıq” qeyri-əhali ödənişlərində müştərilərdən 1 AZN borcdan əlavə ödəmə olmalıdır. Bu, xəbərdarlıq kimi bütün terminalların, aparatların üzərində həmin xidmətə daxil olaraq monitorda qeyd olunub. Bu qərar “Milliön” və “Azərişıq” arasında qarşılıqlı razılaşma əsasında qəbul edilib. Bu, yalnız “Milliön” köşklərinə şamil olunmur. Ümumi olaraq “Azərişıq” tərəfindən tətbiq olunan razılaşma əsasında rəqib şirkətlərə də şamil edilir”, - deyə o bildirib.
Məsələylə bağlı “Azərişıq” ASC-nin mətbuat xidmətinin rəhbəri Vaqif Aydınoğlunun AYNA-ya dediyinə görə, istifadə edilən elektrik enerjisinin dəyəri Azərbaycan Respublikası Tarif (qiymət) Şurasının müəyyən etdiyi qiymətlərlə tənzimlənir ki, təqdim olunan bildiriş və hesab fakturalarda bu, açıq-aydın göstərilməkdədir: “Təəssüf ki, bəzi media orqanları ödəmə terminalının nümayəndəsinin sözlərini “Azərişıq” ASC adından təqdim etməklə abonentlər arasında çaşqınlıq yaradıb. “Azərişıq” ASC tərəfindən istehlakçılara təqdim edilmiş bildiriş və hesab fakturadakı məbləğlərdən əlavə hər hansı məbləğ tələb olunmur. Əhali istehlakçıları tərəfindən nəğd ödəmələrə görə aparılan əməliyyatların xərci isə “Azərişıq” ASC tərəfindən ödənilir. Yəni əhali abonentlərimizdən ödəmə terminalı, ümumiyyətlə hər hansı bir əlavə xidmət haqqı ala bilməz”.
“Bir daha bildiririk ki, qeyri-əhali (kommersiya müəssisələri və s.) istehlakçıları tərəfindən ödəmə terminallarına nağd ödəniş zamanı xidmət haqqı tətbiq olunmasının “Azərişıq” ASC ilə heç bir əlaqəsi yoxdur. Əksər qeyri-əhali istehlakçıları tərəfindən, istifadə etdikləri enerji haqlarına görə ödənişlər banklar vasitəsilə köçürmə yolu ilə aparılır, nağd ödənişlər zamanı isə ödəniş operatorları üzrə seçimi abonent özü müəyyən edir”, - deyə qurum rəsmisi bildirib.
Aydınoğlu qeyri-əhali qrupu üçün də xərcsiz, alternativ ödəmə yollarının olduğunu vurğulayıb: “Onlar məcbur deyil ki, “MilliÖn” vasitəsilə nəğd şəkildə ödənişlərini etsinlər və əlavə onların tətbiq etdiyi 1 manatı ödəsinlər. Həmin abonentlərimizə də müraciət edirəm ki, alternativ variantlar var: onlayn qaydada, banklar, onlayn ödənişlər vasitəsilə xərcsiz öz ödənişlərini edə bilərlər”.
Baş verənlərin fonunda, “MilliÖn” növbəti açıqlama yayıb. Şirkətin açıqlamasına görə, sözügedən əlavə ödəniş əhalinin işıqpulu ödənişlərinə aid deyil: “Bu, yalnız qeyri-əhali, yəni restoran, mağaza, fabrik, zavod və s. kommersiya obyektlərinə aiddir. Məlumat üçün bildiririk ki, əlavə ödəniş “Azərişıq” ASC tərəfindən deyil, “MilliÖn” tərəfindən tətbiq edilir”.
Araşdırmalardan belə nəticəyə gəldik ki, qeyri-əhali (kommersiya müəssisələri və s.) istehlakçıları tərəfindən ödəmə terminallarına nağd ödəniş zamanı xidmət haqqı tətbiq olunmasını “MilliÖn” şirkəti həyata keçirir. Yəni həmin məbləğ şirkətin balansına köçürülür.
Şirkət belə bir qərarın icrasına nə zamandan başlayıb? Sözügedən məbləğin şirkətin balansına keçməsi hansı zərurətdən meydana gəlib və məqsəd nədir?
AYNA bütün bu suallara cavab almaq üçün “MilliÖn” şirkəti ilə əlaqə saxlayıb. Lakin indiyədək sorğumuz cavabsız qalıb.
Məsələnin hüquqi tərəfinə toxunan hüquqşunas Fərhad Mehdiyev AYNA-ya açıqlamasında bildirdi ki, "MilliÖn" kimi provayderlərin banklarla və xidmət göstərən qurumlarla (məsələn, "Azərişıq", "Azəriqaz" kimi sonuncu ödənişi qəbul edən təşkilatlarla) bir razılaşması olur: