Arxiyepiskop iyunun 17-də İrəvanın Baqramyan prospektində toplaşmağa çağırış edib
Ermənistanın “Vətən naminə Tavuş” hərəkatının lideri, arxiyepiskop Baqrat Qalstanyan tərəfdarlarını iyunun 17-də İrəvanın Baqramyan prospektində toplaşmağa çağırıb.
Keşiş sabahdan etibarən Baqramyan prospektinin açılacağını, 4 günlük proses başa çatdıqdan sonra çadır şəhərciyinin yığışdırılacağını bildirib.
“Növbəti görüşümüz iyunun 17-də burada olacaq, saat 18:30-dan burada toplanacağıq. Bundan əvvəl siyasi qüvvələrlə həm birgə, həm də fərdi görüşlərimiz olacaq. Biz yenidən toparlanmalıyıq, hərəkat daha geniş, daha sivil və daha səylə qələbəyə çatmalıdır”, - keşiş deyib.
Qeyd edək ki, Ermənistan Parlamentinin spikeri Alen Simonyan iyunun 17-də İrəvanda növbədənkənar iclasın keçirilməsi haqqında qərar imzalayıb. İclasın gündəliyinə hökumətin istefası və yenisinin formalaşdırılması məsələsi daxildir.
İyunun 9-da keçirilən mitinqdə Qalstanyan iyunun 10-dan etibarən 96 saatlıq fasiləsiz tətil və etiraz aksiyalarına çağırıb. O, həmçinin deputatları hazırkı hökumətin istefası və yeni hökumətin formalaşdırılması gündəliyi ilə parlamentin növbədənkənar iclasını keçirməyə səsləyib. İyunun 10-na keçən gecə hərəkat tərəfdarları Baqramyan prospektinin kəsişməsində çadırlar qurublar.