Madrid NATO müttəfiqlərinin PURL təşəbbüsünə qoşulmaq qərarına gəlib
İspaniya Ukraynaya çatdırılmaq üçün Amerika silahlarının alınmasını maliyyələşdirəcək. AYNA.AZ xəbər verir ki, bu barədə “El País” məlumat yayıb.
Nəşrin yazdığına görə, bir qədər tərəddüddən sonra Madrid NATO müttəfiqlərinin Kiyev üçün Amerika ehtiyatlarından silah aldığı PURL təşəbbüsünə qoşulmaq qərarına gəlib. 2024-cü ildə imzalanmış müqaviləyə əsasən, İspaniya artıq Ukraynaya hər il 1 milyard avro dəyərində yerli istehsal silahları tədarük edir.
Qəzet qeyd edir ki, Avropa İttifaqı ciddi iqtisadi çətinliklərlə üzləşən Kiyevə dəstəyi davam etdirmək yollarını axtarır. Nəşrin mənbələri İspaniyanın ödəməli olacağı məbləğin hələ müəyyən edilmədiyini bildirib. Madridin Amerika hərbi avadanlığı alması, NATO daxilində müdafiə xərcləri ilə bağlı fikir ayrılıqları fonunda yaranan Krallıq və ABŞ arasında gərginliyi azaltmağa kömək edə bilər.
Oktyabrın 15-də İspaniyanın müdafiə naziri Marqarita Robles ölkənin PURL-ə qoşulma ehtimalını istisna etməyib.