Nazir: “Xəstəxanaya yerləşdirilənlərin sayı da ikiqat artıb"
İranda hava çirkliliyi hər il 50.000 insanın ölümünə səbəb olur. AYNA.AZ IRNA-ya istinadən xəbər verir ki, bu barədə İranın səhiyyə naziri Məhəmməd Rza Zəfərqandi universitet rektorları ilə görüşdə deyib.
Nazir qeyd edib ki, səhiyyə problemlərinin əsasən iqtisadi və sosial amillərdən qaynaqlandığı bildirilir: "Bu cür problemlərdən biri hava çirkliliyidir. Hər il hava çirkliliyindən 50.000 insanın öldüyünün şahidi oluruq. Xəstəxanaya yerləşdirilənlərin sayı da ikiqat artıb".
Zəfərqandinin sözlərinə görə, universitetlər səhiyyə məsələlərinə problem həlli yanaşması ilə yanaşmalıdırlar.
"Əgər tibb elmində irəliləyiş əldə etmək istəyiriksə, mütəxəssislər universitetləri dəstəkləməlidirlər. Səhiyyə sektorunda əhəmiyyətli maliyyə imkanları var", - deyə o bildirib.
İranda hava çirkliliyinin səbəbləri istehsal olunan benzinin keyfiyyətinin aşağı olması ilə bağlıdır. Keyfiyyətsiz yanacaq, köhnə avtomobillər, motosikletlər və elektrik stansiyaları ictimai sağlamlığa mənfi təsir göstərən zərərli qazlar buraxır.
Hibrid mühərriklərin istehsalı, elektrik motosikletlərinin paylanması və Avro-5 benzininin tətbiqi də daxil olmaqla müxtəlif tədbirlərə baxmayaraq, İran hələ də əhəmiyyətli irəliləyişlərə nail ola bilməyib.