Lindsi Forman və Kreyq Forman casusluqda ittiham olunurlar
Britaniya vətəndaşları Lindsi Forman və Kreyq Forman İranda casusluq ittihamları ilə 10 il həbs cəzasına məhkum ediliblər. AYNA.AZ-ın “Sky News”a istinadən məlumatına görə, cütlüyün ailəsindən bildirilib ki, bu hökm İranda Britaniya vətəndaşlarının siyasi motivli ən sərt həbslərindən biridir.
Onlar həmçinin məhkəmənin cəmi üç saat davam etdiyini və təqsirləndirilən şəxslərə özlərini tam müdafiə etmək imkanı verilmədiyini iddia ediblər.
Britaniya xarici işlər naziri İvet Kuper qərarı pisləyərək, onu "dəhşətli və əsassız" adlandırıb. O Britaniya hökumətinin Formanların vətənlərinə təhlükəsiz qayıtmasını və ailələri ilə yenidən birləşməsini təmin etmək üçün İran hakimiyyəti ilə qətiyyətlə işləməyə davam edəcəyini vurğulayıb.
Cütlük 2025-ci ilin yanvar ayında İranda dünyanı motosikletlə gəzərkən saxlanılıb. Onlar casusluqda ittiham olunublar və Formanlar bu ittihamları qətiyyətlə rədd edirlər.
Hazırda onlar Tehranın Evin həbsxanasında saxlanılırlar. Ailə üzvləri və Britaniya rəsmiləri onların işinə beynəlxalq hüquqa uyğun olaraq yenidən baxılmasını və ədalətli məhkəmə prosesinin təmin edilməsini tələb edirlər.