“Adı çəkilən ərazi üzərindən uçmaq üçün heç bir uçuş planı qəbul edilməyəcək”
Misir cümə axşamı səhər saatlarında bütün hava yollarına üç saat ərzində İranın hava məkanından çıxmağı tapşırıb. AYNA “Reuters”ə istinadən xəbər verir ki, qərar İran və İsrail arasında münasibətlərin pisləşməsi ilə bağlıdır.
Çərşənbə günü pilotlara göndərilən təhlükəsizlik bildirişində məhdudiyyətin GMT saat 0100-dan 0400-a qədər qüvvədə olacağı bildirilib. Bildirişin verilmə səbəbi ilə bağlı əlavə təfərrüatlar təqdim olunmayıb.
“Bütün Misir aviadaşıyıcıları Tehran üzərində uçuşlardan çəkinməlidirlər. Adı çəkilən ərazi üzərindən uçmaq üçün heç bir uçuş planı qəbul edilməyəcək”, - deyə bildirişdə üç saatlıq məhdudiyyət müddətinə istinad edilib.
Misirin Mülki Aviasiya Nazirliyi daha sonra təsdiqləyib ki, bildiriş İran hakimiyyətinin uçuşların təhlükəsizliyini təmin etmək üçün tövsiyələrini nəzərə almaq zərurəti ilə əlaqədardır.
Hərbi təlimlər avqustun 7-də Tehran vaxtı ilə saat 11:30-dan 14:30-a qədər və avqustun 8-i saat 4:30-dan 7:30-a qədər İranın hava məkanında keçirilir, mülki aviasiya nazirliyinin bəyanatında deyilir.
Bazar günü İordaniya səlahiyyətliləri, təyyarələri krallığın hava limanlarına enəcək bütün aviaşirkətlərdən mümkün uçuşun əlavə 45 dəqiqə uzadılması üçün yanacaq doldurmağı xahiş edib.
İordaniya da daxil olmaqla, region ölkələri İranın İsrailə raket hücumlarına cavab olaraq bu ilin əvvəlində hava məkanını bağlamışdı.