İqtisadiyyat Nazirliyinin binasında və bir nəfərin evində axtarışlar aparılır
Ermənistan Milli Təhlükəsizlik Xidməti (MTX) İqtisadiyyat Nazirliyində əməliyyat-istintaq tədbirləri həyata keçirir. AYNA xəbər verir ki, bu barədə “Sputnik Ermənistan”a nazirliyin mətbuat katibi Astqi Sarkisyan bildirib.
Keçmiş nazir müavini Ani İspiryanın və Dövlət İnvestisiya Siyasəti Departamentinin rəhbəri Lili Sirakanyanın ofisində axtarışların aparılması ilə bağlı mətbuatda dərc olunan yazılara gəlincə, Sarkisyan qeyd edib ki, o, istintaq tədbirlərini şərh etmir.
“Biz korrupsiyaya qarşı mübarizəni son dərəcə vacib hesab edirik və təqsirsizlik prezumpsiyasını rəhbər tuturuq”, - Sarkisyan bildirib.
“Sputnik Ermənistan” xəbər verir ki, İspiryan və Sirakanyan dindirilməyə aparılıb.
Bu arada, “Hraparak” qəzeti yazıb ki, MTX Ermənistanın iqtisadiyyat nazirinin keçmiş müavini Ani İspiryanın ofisində axtarış aparır və onun əşyaları müsadirə edilib.
“Müxbirimiz iqtisadiyyat naziri Vaan Kerobyandan hüquq-mühafizə orqanlarının əməkdaşlarının nazirliyə niyə gəldiyini və kimləri həbs etdiklərini soruşduqda, Kerobyan məlumatsız olduğunu bildirdi və qeyd etdi ki, bunu MTX-dən soruşmaq lazımdır. Eyni zamanda o, hüquq-mühafizə orqanlarının əməkdaşlarının nazirlik binasına gəlişinin onun üçün sürpriz olduğunu, bu barədə parlamentdə məlumat aldığını dedi”, - nəşr yazıb.
Qeyd edək ki, dünən Baş nazir Nikol Paşinyan Ani İspiryanın Ermənistan iqtisadiyyat nazirinin müavini vəzifəsindən azad edilməsi haqqında qərar imzalayıb. O, bu vəzifəni 2021-ci ildən tutur.
Jurnalistlərin Ani İspiryanın vəzifədən çıxarılmasının MTX-nin əməliyyatı ilə üst-üstə düşməsi ilə bağlı suallarına cavab olaraq nazir bunun sadəcə təsadüf olduğunu bildirib.
"Ani bir ay yarım əvvəl ərinin Hollandiyada iş təklifi aldığını və köçəcəklərini bildirdi", nazir söyləyib.
“168.am”ın məlumatına görə isə Ani İspiryan MTX tərəfindən saxlanılıb.
Ermənistan İstintaq Komitəsi isə İspiryanın saxlanılması ilə bağlı məlumat verməyib, lakin nazirlikdə və digər ünvanlarda genişmiqyaslı istintaq hərəkətlərinin aparıldığını açıqlayıb.
“Ermənistan İstintaq Komitəsinin dövlətə, konstitusiya quruluşunun əsaslarına və ictimai təhlükəsizliyə qarşı cinayətlərin araşdırılması üzrə Baş İdarəsində və Ermənistan Respublikası İstintaq Komitəsinin xüsusi işlər üzrə Baş İdarəsində həyata keçirilən iki müxtəlif cinayət işi üzrə Ermənistan İstintaq Komitəsinin məmurları, müstəntiqləri və MTX-nin əməkdaşları birgə təxirəsalınmaz irimiqyaslı istintaq və digər prosessual tədbirləri həyata keçirir. Axtarışlar İqtisadiyyat Nazirliyində və bir nəfərin evində aparılır. Təfərrüatlar barədə əlavə məlumat veriləcək”, - məlumatda vurğulanıb.