“Qarabağ əldən gedəcək, amma həyatda hər şeyə görə hesab ödəməlisən”, - Valentin Vasilesku
“Ermənistanın 27 sentyabrda başlatdığı hərbi təxribat, agentləri İrəvanın ən yüksək ofislərini işğal edən xarici kukla oynadanlar tərəfindən diqqətlə təşkil edilib. Və bu təxribatın məqsədi də eynidir - Moskvanın Azərbaycanla münaqişədə hərbi yardım göstərməyəcəyindən istifadə edərək Rusiyanı Ermənistandan sıxışdırmaq”.
Bunu AYNA-ya rumıniyalı hərbi ekspert Valentin Vasilesku deyib. Onun sözlərinə görə, 2019-cu ildə ABŞ Ordusu Baş Qərargah Rəisləri Komitəsinin, G-8 Baş Qərargah rəhbəri müavininin kanselyariyası, Ordu İdarəetmə Qərargahının birbaşa sponsorluğu ilə, xüsusən də keçmiş SSRİ ölkələrində Rusiyanın geosiyasi təsirinin məhv edilməsi mexanizmlərini təsvir edən bir araşdrıma nəşr olundu.
“Burada ABŞ-ın Ermənistanı Rusiya ilə münasibətləri pozmağa razı salmağa çalışması təsvir olunur. Bu istiqamətdə ilk addımlar Ermənistanın Əfqanıstandakı NATO ordusuna qoşun göndərməyə başladığı zaman atıldı. ABŞ-ın Cənubi Qafqazdakı strateji vəzifəsi Ermənistanın NATO orbitinə tam daxil edilməsidir. Doğrudan da, bu vəziyyətdə Rusiya Gümrüdəki hərbi bazasını və İrəvan yaxınlığındakı aviabazanı tərk etməli və Cənub Hərbi Dairəsinin saxlanılması və yenidən silahlandırılması üçün böyük məbləğlər ayırmalıdır”, - mütəxəssis bildirib.
Vasileskunun fikrincə, Azərbaycan həm Qərblə, həm də Rusiya ilə dialoqda son dərəcə rahat bir mövqe tutub və onu mövqeyindən uzaqlaşdırmaq mümkün deyil: “Ermənistanda son inqilab və qərbyönümlü qüvvələrin hakimiyyətə gəlməsi fonunda, İrəvanda Qərbə kəskin dönüş ehtimalı olduqca realdır - Rusiyanın mövqeyindən narazılığın ortaya çıxması bunun üçün kifayət edir”.
“Son günlər baş verən genişmiqyaslı hərbi əməliyyatlar zamanı Rusiyanın Ermənistana təsirli yardım göstərmədiyini və Kollektiv Təhlükəsizlik Müqaviləsi Təşkilatının (KTMT) yalnız ümumi narahatlığını ifadə etdiyini və yardım çağırışlarına cavab vermədiyini nəzərə alsaq, işğal altındakı ərazilərin itirilməsi kimi kəskin anti-Rusiya hissləri dalğası da uzaq deyil. Bu fonda Ermənistan sakitcə KTMT-dən, Avrasiya İqtisadi İttifaqından çıxa və NATO ilə yaxınlaşma yolunu tuta bilər. Düzdür, Qarabağı itirməli olacaq, amma bu həyatda hər şeyə, o cümlədən siyasi fırıldaqçılığa görə hesab ödəməlisən”, - müsahibimiz fikrini yekunlaşdırıb.
Yusuf Poladov,
xüsusi olaraq AYNA üçün