Avstriya hökuməti hesab edir ki, Rusiya qazından asılılıq Avstriya iqtisadiyyatını təhdid edir
Avstriyanın hakim koalisiyası 2027-ci ilə qədər Rusiya qazının mərhələli şəkildə dayandırılmasını ölkənin yeni təhlükəsizlik strategiyasına daxil etməyə razılaşıb. AYNA xəbər verir ki, bu barədə “Kurier” qəzeti yazıb.
Nəşr qeyd edib ki, hazırda məsələ yekunlaşmaq üzrədir.
Avstriyanın Rusiya qazından imtina etməsinin səbəblərindən biri də Moskvanın yanacaq satışından əldə etdiyi vəsaitin Ukraynaya qarşı müharibənin maliyyələşdirilməsinə sərf olunmasıdır. Avstriya hökuməti hesab edir ki, Rusiya qazından asılılıq Avstriya iqtisadiyyatını təhdid edir.
Son hesablamalara görə, Rusiyadan gələn təbii qaz Avstriya boru kəmərlərindəki qazın ümumi həcminin 80-90%-ni təşkil edir. Nəşr qeyd edir ki, keçən il Vyana “Qazprom”a təxminən 4 milyard avro köçürə bilərdi.
Fevral ayında Avstriyanın energetika naziri Leonor Gevessler Avstriyanın neft-qaz şirkəti OMV və “Qazprom” arasında 2040-cı ilə qədər qüvvədə olan uzunmüddətli müqavilələrdən çıxmaq barədə düşünmək niyyətində olduğunu açıqlamışdı. Daha sonra OMV qeyd edib ki, lazım gələrsə, şirkət Avstriya istehlakçılarını qeyri-rus mənbələrindən 100% qazla təmin edə biləcək, lakin Rusiya Federasiyasından yanacaq almaqdan imtina etmək üçün müvafiq hüquqi baza yaratmaq lazımdır.
Moskvanın Ukraynada genişmiqyaslı müharibəyə başlamasından sonra Rusiya qazının Avropaya tədarükü beş dəfə azalaraq 1970-ci illərin səviyyəsinə çatdı və Avropa Komissiyasının məlumatlarına görə, “Qazprom”un Avropa bazarındakı payı üç dəfə – 45%-dən 15%-ə qədər azaldı.
İndiki şəraitdə Azərbaycan Avropaya qaz tədarükünü artırır, Moskvanın son yarım əsrdə demək olar ki, tamamilə nəzarətində olduğu bazarda Rusiyanı əvəz edir. Beləliklə, avqustun 1-dən Xəzər dənizindəki nəhəng “Şahdəniz” yatağından Azərbaycan qazı Sloveniyaya axmağa başlayıb. Bundan əvvəl İtaliya, Yunanıstan, Bolqarıstan, Rumıniya, Macarıstan və Serbiya Azərbaycandan qaz almağa başlayıb. Bundan əlavə, Azərbaycan qazı Gürcüstan və Türkiyəyə satılır.
2024-cü ildə Macarıstan, Slovakiya və Avstriya Avropadakı borular vasitəsilə Rusiya qazını almağa davam edirlər.