“Ukrayna bütün ərazilərini güc və silahla azad etməməlidir, çünki bu seçim böyük insan itkiləri və vaxt itkisi deməkdir”
Ukrayna Prezidenti Volodimir Zelenski müharibəni dayandırmaq üçün Ukrayna ərazilərinin gələcək taleyi ilə bağlı referendumun keçirilməsini istisna etmir. AYNA xəbər verir ki, bu barədə Ukrayna lideri “Le Monde” qəzetinə müsahibəsində deyib. Amma Prezident bunun üçün ukraynalıların istəyinin lazım olduğunu qeyd edib.
Zelenski bildirib ki, Ukraynanın ərazi bütövlüyü məsələsi yalnız Prezident tərəfindən həll edilə bilməz, çünki bu, konstitusiyaya ziddir.
“Referendum? Ukrayna xalqı bunu istəməlidir. Açığı, bu, ən yaxşı variant deyil, çünki biz Putinlə məşğul oluruq və o, ərazilərimizin bir hissəsini özü üçün alarsa, bu, onun qələbəsi olacaq”, - deyə dövlət başçısı öz fikrini bildirib.
Ukrayna “bütün ərazilərini güc və silahla azad etməməlidir, çünki bu seçim böyük insan itkiləri və vaxt itkisi deməkdir”, deyə Zelenski əlavə edib: “Biz ərazilərimizi diplomatik yollarla qaytara bilərik”.
İyulun 22-də Zelenski BBC-yə müsahibəsində deyib ki, Ukrayna Rusiya ilə müharibəyə son qoymaq üçün danışıqlara hazırdır, hətta sonuncuya Vladimir Putin rəhbərlik etsə belə. Ukrayna Prezidentinin sözlərinə görə, bu məsələdə əsas şey beynəlxalq hüquq normalarına uyğun şərtlərlə sülhə nail olmaq istəyidir.