İran İsrailin hücumuna cavab vermək üçün bir neçə variant hazırlayıb
İranın İsrailin mümkün zərbəsinə reaksiyası onun şiddətindən asılı olacaq. AYNA xəbər verir ki, bu barədə “The New York Times” məlumatlı mənbələrə istinadən yazıb.
Dörd İran rəsmisinin sözlərinə görə, İranın Ali Dini Rəhbəri Ayətullah Əli Xamenei orduya İsrailin hücumuna cavab vermək üçün çoxsaylı hərbi planlar hazırlamağı əmr edib.
Nəşrin həmsöhbətləri qeyd ediblər ki, İranın cavabının miqyası əsasən İsrailin hücumlarının şiddətindən asılı olacaq.
“İsrail öz hücumlarını raket və pilotsuz təyyarələrin saxlandığı bir neçə hərbi baza və anbarla məhdudlaşdırarsa, İran heç nə etməyəcək”, deyə mənbələr bildiriblər.
Lakin İsrailin zərbəsi əhəmiyyətli zərərə və çoxsaylı insan tələfatına səbəb olarsa, İran cavab verəcək.
“İsrail neft və enerji infrastrukturuna və ya nüvə obyektlərinə hücum edərsə və ya yüksək vəzifəli məmurları öldürərsə, Tehran da sərt cavab verəcək”, - deyə mənbələr qeyd ediblər.
Nəşrin mənbələrinin sözlərinə görə, 1000-ə qədər ballistik raketin buraxılması, İran silahlı qruplarının bölgədə hücumlarının artması, Fars körfəzi və Hörmüz boğazı vasitəsilə qlobal enerji təchizatının və gəmilərin daşınmasının dayandırılması cavab tədbirləri kimi qiymətləndirilir.