DİN etiraz aksiyası zamanı yolun təkrar bağlanması ilə bağlı cinayət işi açıb
Gürcüstan Daxili İşlər Nazirliyi (DİN) Tiflisdə fəal etirazçı Zurab Menteşaşviliyə toplantı və nümayişlərin keçirilməsi qaydalarını pozduğuna görə cinayət işi açıb. AYNA.AZ gürcü mediasına istinadən bildirir ki, DİN-dən verilən açıqlamaya görə, son beş gün ərzində polis Tiflisdə toplantı və nümayişlərin keçirilməsi qaydalarını pozduğuna, xüsusən də Rustaveli prospektini qanunsuz bağladığına görə 29 etirazçını saxlayıb.
Nazirliyin məlumatına görə, Menteşaşvili 24 oktyabr 2025-ci ildə oxşar hərəkətlərə görə saxlanılıb və yeddi gün həbs cəzasına məhkum edilib. Təkrarlanan cinayətə görə, ona qarşı Cinayət Məcəlləsinin toplantı və ya nümayiş keçirmək qaydalarını pozduğuna görə məsuliyyət nəzərdə tutan 347-ci maddəsinin 1-ci hissəsi ilə cinayət işi açılıb.
Qeyd edək ki, Gürcüstanda etirazlar 28 noyabr 2024-cü ildə hökumətin Avropa İttifaqına üzvlük danışıqlarının 2028-ci ilə qədər gündəmdən çıxarılması qərarına qarşı başlayıb.
Etirazçılar hökuməti Avropaya inteqrasiyadan imtina etməkdə günahlandırır və qanunsuz olaraq həbsdə saxlanıldığına inandıqları şəxslərin azad edilməsini və erkən parlament seçkilərinin keçirilməsini tələb edirlər.
Gürcüstan hakimiyyəti buna əməl etməkdən imtina edir və cavab olaraq etirazların keçirilməsi qaydalarını sərtləşdirmək qərarına gəlib. O cümlədən strateji obyektlərə qarşı piketlərin keçirilməsinə qadağa qoyulub, yolların əsassız bağlanması, maska taxılması və bu qaydaları pozduqlarına görə cərimələrin və həbs cəzalarının artırılması qərarına gəlinib.